E fecha di transishon 10-10-'10 ora pa ora ta birando ménos faktibel den bista di Tweede Kamer o sea di parlamento ulandes. Sekretario di estado Ank Bijleveld di Relashonnan den Reino a menshoná e fecha akí pa desmantelashon di Antia ulandes. E ánimo sombrio den seno di Tweede Kamer a manifestá durante e deliberashon general di e Komishon Permanente di Parlamentario enkargá ku asuntunan antiano i arubano.

No opstante e echo ku desmantelashon di Antia ulandes ta kanando stèdi, e proseso di lantamentu di e paisnan nobo Kòrsou i Sint Maarten ta práktikamente paralisá. E kos akí ta prekupá parlamento ulandes. Bijleveld enkambio ta sigui optimista. "Loke sí mi ta kontentu kune ta ku tur hende ta mira ku e pais ta den un proseso di deskomposishon i ku realmente tin nesesidat di algu diferente. Mi ta kere sí ku e garantianan ku nos tin awor den e Algemene Maatregel van Bestuur (e medida general di gobernashon) ta mas ku sufisiente kompará ku e kondishonnan palabrá."

Kon ku bai bin, algu lo tin di sosodé riba 10-10-'10, segun e sekretario di estado, tambe si keda sin kumpli ku tur kondishon. "Pais Antia no ta bai funshoná mió ya ku lo sigui desmantel'é i ademas e ta enkargá ku traspaso di su tareanan. E garantianan ta supos di ta reglá kaba i ta nan ta den e AMVB."
Parlamento ulandes ta teme ku ta krea paisnan bashí, pasobra e AMVB lo saka parlamento for di operashon. "Mi'n ta kere", asina e mandatario ulandes a bisa.  "Semper por pidími aklarashon di loke ta pasando bou di hurisdikshon di AMVB i por pidími kuenta i rason tokante AMVB mes tambe."

Sobretodo riba tereno di polis ta reina hopi prekupashon den Tweede Kamer. Ta pa e motibu akí e sekretario di estado ta ta haña ta bon ku representantenan di Antia tabata presente na e deliberashon general, moda ku aya tambe lo realisá ku e angustia ta algu ku realmente ta biba den seno ulandes. "Nan mester realisá ku nos ke avansá ku e grupo di direkshon polítiko na desèmber, sino ta bira difísil pa kumpli ku e kondishonnan palabrá."

Awe 29 di òktober sekretario di estado Bijleveld lo barka pa Antia pa un bishita di trabou. Djabièrnè 30 di òktober lo e bishitá Aruba en konekshon ku kambio di gobièrnu na e isla. Tambe lo e bolbe eksponé e areglo di atmishon pa Ulandesnan oropeo na Aruba.
 

Skucha Scarlet Windster den kòmbersashon ku Ank Bijleveld (na ulandes). Tambe por skucha splikashon di Scarlet Windster na papiamentu den Aki na Hulanda di djaweps, 29 di òktober.