Dies aña pasá nan tabata promé minister di Antia. Suzy Camelia-Römer pa Partido Nashonal di Pueblo (PNP), siguí pa Miguel Pourier pa Partido Antia Restrukturá (PAR). Pourier a lanta PAR pa restrukturá Antia i tene nan huntu. Dies aña despues e pais ta kasi kla pa desmantelá dia 10 di òktober 2010.

Skibí pa Miriam Sluis
 

Miguel Pourier te ainda ta partidario di un Antia uní. "Mi ta di opinion ku e sinku islanan huntu kon ku bai bin tin un poko mas posibilidat ", Pourier ta bisa. "Espesialmente pa loke ta trata mantenshon di outonomia."
 

E ta enfatisá ku e situashon di Islanan BES, Boneiru, Statia i Saba, den e konstrukshon nobo lo ta unu kaminda nan lo dependé hopi di Hulanda, bo por bien lubidá ku bo tin bos den tareanan nashonal.
 

Ultimo Antiano

Pourier no ta mira e kambionan estatal di forma positivo so: "Semper mi a lucha pa mantené union. Ma di otro banda mi ta bisa: pueblo a opta, ke men mi ta konformá. Pero si mi mester ta e último Antiano, wèl t'asina mes anto."
 

Na òktober di aña 1999 Pourier a sigui Suzy Camelia Römer komo promé minister. Camelia-Römer tabata pro desmantelashon di Antia for di aña 1992. E proseso aktual e ta mira komo un paso den direkshon di un vishon, ku e tabatin kaba. "Den e proseso aki a hasi algun kompromiso, ku segun mi ta nesesario pa dal un paso dilanti pa un mihó futuro pa Kòrsou. Ma mi ta kere ku den futuro sí nos mester sinta na mesa ku Hulanda pa atendé ku Statüt mes i koregí algun asuntu.
 

Mankomunidat

Segun Camelia-Römer un Kòrsou independiente den un Mankomunidat ku Hulanda ta e mihó futuro pa e isla. "Ke men e kresementu estatal di Kòrsou pa mi no ta kaba ku e proseso aki." E proseso di negoshashon estatal - Camelia-Römer tin un posishon importante komo konsehero di gobièrno Antiano - segun e ta karakterisá su mes pa komplehidat.
 

"Ta masha interesante", e ta bisa, "mi ke ku historia lo husga si den Reino, na un manera pasífiko, nos a sa di desmantelá henter un pais i a pasa pa formanan nobo den Reino.

(tradukshon Rita van der Heul)

Skucha e reportahe (na Hulandes)