Minister Piet Hein Donner di Relashon Interno i Relashonnan di Reino ta haña ku Hulanda mester ta mas reservá ora ta trata relashon ku Kòrsou i Sint-Maarten. For di 10 di òktober nan ta pais outónomo den Reino Hulandes.

Djaweps 2 di desèmber parlamento hulandes a pidi Donner pa e intervení den gobernashon di Kòrsou i Sint-Maarten. Parlamentarionan hulandes ta masha prekupá ku integridat di e mandatarionan i maneho di finansa na e islanan.

Kapasidat pa e mes resolvé su problema
Pero Donner a insistí na promé instante ku Kòrsou mes mester resolvé e problemanan. Hulanda tin e posibiliat di intervení, pero promé mester laga Kòrsou uza su kapasidat pa e mes resolvé su problemanan. Si esei no bai bon, Donner ta dispuesto pa papia ku parlamento hulandes tokante medidanan.

Donner a señalá ku ta via elekshon demokrátiko a yega na formashon di e gobièrnunan. 'Si nos no ta di akuerdo ku e manera ku kosnan ta kana aya banda, nos no por start un diskushon mesora atrobe ku kosnan mester kana diferente aya,' asina e minister di CDA a bisa. Hulanda no mester legumai e islanan, pero e mester ta reservá sí i duna nan un chèns pa nan krese.

Skrinmentu
For di 10 di òktober Kòrsou tin un gobièrnu nobo, pero te ainda no tin resultado di skrinmentu di e ministernan. Ta pesei kana di algun partido di oposishon a yena. Ronald van Raak di SP ta haña ku Donner mester tuma e skrinmentu awor na su enkargo i ku eventualmente e mester hasi uzo di servisio di seguridat hulandes. 'Nos no por aseptá ku Kòrsou ta kuminsá ku un gobièrnu ku no ta digno di krédito. Hulanda ta responsabel pa bon maneho riba e islanan', asina e ta bisa.

Polítika di krenwa
Parlamentario Ineke van Gent di GroenLinks tambe ta insistí pa tuma medida, pasó e ta masha prekupá ku gobernashon, polítika di krenwa i e tendensha 'anarkista' serka algun hende na Kòrsou. Hero Brinkman di PVV ta haña ku 'sigur den e kaso di antiano' ta importante pa investigá nan pasado, pa evitá ku ministernan ku tin laso ku narkotráfiko, òf ku minister korupto ta bini na mando. 'Awor Kòrsou a para bira un repúblika salbahe, korupto ku no konosé stabilidat polítiko', asina Brinkman ta bisa.

Na Sint-Maarten skrinmentu di e ministernan no tabata motibu di prekupashon.