Amnesia i Su’Legria na Kòrsou, fiestanan grandi na Boneiru i e afterparty di Marc Anthony i Juanes na festival di sine di Aruba: djis algun lugá kaminda Aleandro Ribeiro a presentá último simannan. Komo ‘dj NRG’ el a hinka públiko riba tur isla den trans. Detaye chikí: ta diesseis aña so e tin.

“Sòri, m’a kab’e lanta fo’i soño. Bo por a ward’un ratu mi ta kore dal un baño.” Ta djaluna meinta 11 or i Aleandro tin poko problema pa bini bei. “Ayera ‘nochi m’a toka te tres or na Wet and Wild i promé ku esei mi tabata na Hyatt”, e ta konta. “Djasabra ‘nochi m’a toka na Bananas i esei tambe a bira lat, ke men t’awe m’a saka poko soño.”

I tin tur tempu p’esaki pasobra Aleandro tin fakansi. Algun siman pasá el a slag pa vsbo na Marnixcollege i otro aña e ke bai studia MBO Marketng na Hulanda. “Pero e aña akí mi ta keda aki un ratu”, e ta bisa. “Kue eksperiensha, pone mi nòmber bira konosí i pensa kon mi ta bai trata tur kos den futuro.”

Spar pa un ‘turntable’
Palabra sabí pa un hóben di diesseis aña. Pero Aleandro for di hóben tabata sa ku ta dj e ker a bira. “Ora m’a mira dj Carlito toka na un fiesta di mi tanta i m’a ripará kon entusiasmá públiko tabata bira di e muzik m’a disidí ku mi tambe ke hasi esaki.” E tempu ei Aleandro tabatin diestres aña i di su sèn di spar el a kumpra un turntable. Ku sine di instrukshon di Youtube el a siña e kosnan básiko. “Na un dado momento m’a pensa ku mi por basta bon i m’a yama dj Carlito na telefon”, Aleandro ta konta. “El a siñámi hopi i a yudámi haña mi promé presentashonnan.”

Imposibel pa deskribí
I djei kos por kuminsá kore lihé riba un isla chikí manera Kòrsou. ‘Dj NRG’ aktualmente tres be pa siman ta pará tras di su turntablenan. Kumbre di e aña aki p’e tabata Amnesia, e festival di dance di mas grandi di e isla. “Tabatin sigur 2000 hende i tur hende a bira loko. Tur e mannan ei den laria, i ami tabatin e direkshon”, Aleandro ta konta mashá entusiasmá. Loke bo ta sinti na un evento asina ta imposibel pa deskribí.

Su mama Irene tabata den públiko i su ruman muhénan Amanda (20), Gabriela (19) i Angelisa (17) tambe. Aleandro ta e Benjamin di famia. “Den kuminsamentu nan tabata hari mi plannan di dj pero entretantu tur hende ta masha orguyoso. Mi a mustra ku berdaderamente t’esaki mi ke.”

Skor internashonalmente
Den futuro e dj ta spera di por presentá na e fiestanan di dance hulandes i belga manera Tomorrowland i Sensation White. E ta disididu pa aki dies aña ta entre e mihó djnan di mundu. “P’esei mi ta traha mi mes tracknan i mi ta toka hopi ‘house’. Pasobra ta esei ta skor internashonalmente. Aki na Kòrsou ta ‘urban’ i ‘local’ ta mas popular pero si mi ke bira grandi mi mester destaká.