Awor porfin ta definitivo: lo disolvé pais Antia hulandes dia 10 di òktober 2010. Riba mésun dia Kòrsou i Sint Maarten lo bira paisnan independiente den Reino. I Bonèiru, Sint Eustatius i Saba lo bira munisipionan ekstraordinario di Hulanda. Esaki ta resultado dje reunion dje grupo di direkshon polítiko ku a tuma lugá ayera na Kòrsou.

Kumpli ku kriteria
Por lo demas e paisnan nobo mester kumpli sí ku un seri di kriteria, asina sekretario di estado Ank Bijleveld di Relashonnan den Reino ta konta. Fuera di esei ta trata partikularmente dje aprobashon dje leinan nobo pa tantu Tweede Kamer komo parlamentu di Antia i lantamentu di instanshanan gubernamental pa e paisnan outónomo nobo Kòrsou i Sint Maarten ku lo sigui independientemente. 

A disidí mas aleu ku den futuro e promé ministernan nobo di Kòrsou i Sint Maarten lo deliberá regularmente ku e mandatario hulandes di Relashonnan den Reino. Nan lo tuma desishon den kaso di tardansa riba por ehèmpel tereno di legislashon i institushon di instanshanan gubernamental. Si nan no por sali afó mutuamente, Konseho di Minister di Reino lo disidí. 

Den Tweede Kamer ta reina hopi duda riba faktibilidat pa loke ta trata Sint Maarten. Bijleveld ta kere ku e prosedura akordá ta kontené sufisiente garantia pa por komplasé Tweede Kamer. "Nos a tene kuenta ku tur palabrashon ku a hasi riba tereno di mantenshon di derecho, finansa i bon gobernashon. Tur esei ta momentunan ku mester komprobá durante e Konferensha di Mesa Rondó final." Bijleveld ke kuminsá mas pronto ku ta posibel ku e konferensha di kontrol, ya asina por kuminsá traha aselerá riba e plannan di enfoke. 
 

Kombatimentu di kriminalidat
Tambe a papia largu tokante kontinuashon dje kombatimentu di kriminalidat organisá i ku ta pasa frontera na e paisnan nobo Kòrsou i Sint Maarten. Segun Hulanda te ku awor e paisnan a logra tiki adelanto. Pa e motibu ei a disidí ku lo prolongá e koperashon ku e tim di Reshèrshi hulandes, esta Recherche Samenwerkingsteam (RST) te ora e kuerponan i polis komun por funshoná sufisientemente kualitativo.

Satisfakshon i alivio
Promé minister Emily de Jongh-Elhage ta kontentu ku e fecha ta fihá awor definitivamente. "Kos tabata mustra difísil, pasobra e opinionnan tokante diferente asuntu tabata leu for di otro. Mi ta kere ku nos a hasi bon palabrashonnan."