Lizanne (Lisa) Dindial tabata pa dies aña largu gezaghebber di Kòrsou. Dindial tabata e promé gezaghebber femenino di Kòrsou, pero alabes e di lastu komo k'e funshon akí no ta eksisti mas n'e isla entrante 10-10-10.

Un par di siman promé k'e fecha akí e mandatario a tuma despedida di pueblo di Kòrsou ku un fiesta di despedida riba Brionplein. A sali na kla, den entrevistanan ku Wereldomroep a hasi, ku un mayoria di esnan k'a keda entrevistá ta reakshoná positivo riba Dindial su funshonamentu komo gezaghebber di Kòrsou.

Reakshon
"Un dje puntonan di mas fuerte ku mi ta haña di dje ta ora ku mi sigui e reunionnan di Konseho Insular. Mi ta haña k'e ta hopi trankil, e sa e prosedura, e sa e regla, e konosé e 'eilandenregeling'. Pues e sa tur biaha kon pa anda den tur situashon i den tur sirkunstansia", segun un dj'esnan entrevistá.

www.rnw.nl/papiaments

Outoreflekshon
Dindial ta mira su mes komo un persona ku a pèrkura pa semper ta altante i bon prepará. "Mi ta kere ku éksito di un hende ta, kon e ta prepará su mes". E mandatario ta sigui konta ku den su funshon komo gezaghebber e tabata prepará su mes, memorisando esaki nan. Na e manera akí e por a anda ku tur sorto di situashon komo mandatario.

Karnaval
Tambe tabata tin esnan entrevistá ku no tabata mashá di kanta makamba k'e funshonamentu dje mandatario kurasoleño. Esaki tabata prinsipalmente durante karnaval. "Mi ta haña ku si bo tin ku hala un liña rekto, bo tin pa trèk e tur momento. E no tabata neutral". Dindial a deklará ku tabata tin mas hende ku a reakshoná manera esun entrevistá akí. "Tin be bo tin ku tuma desishonnan severo. E no tin di haber ku mi no gusta karnaval", segun un Dindial sigur di su kaso.

Sinti falta
Lizanne Dindial ta sigui konta ku el a sirbi pueblo di Kòrsou di kurason. Un dje servisionan komo mandatario k'e lo bai sinti falta di dje ta su shofùr. "E ta tende tur kos ku bo ta papia, e sa ki dia bo no ta sintíbo dje dushi ei, e sa ki dia bo tin nesesidat pa papia" ... E mandatario saliente ta gaba su shofùr, ku segun e nunka no a yega lat pa bin busk'é. "I e fasilidat ku tin. E ta bahámi dilanti porta. E ta buskámi dilanti porta. Mm, mi ta kere esaki ta un dje kosnan ku lo mi sinti falta di dje".

Skucha reportahe di Kelly van der Kwast