Entrante mart di otro aña, e servisionan nobo di kuido pa e partinan di Reino den Caribe lo kana notablemente mas fásil. Kuminsando e luna ei, gran parti di e servisionan di kuido lo ta outomatisá di tal manera ku konsulta, referensia médiko i intervenshon di spesialista lo kana ku hopi ménos burokrasia i doló di kabes.

Esei ta loke Jan Pieter van Zandwijk, direktor di Ofisina di Kuido di Boneiru ta pronostiká. Van Zandwijk ta rekonosé ku e preparativonan pa e kondishon- i prosedimentunan ku a drenta na vigor e aña akí pa e entidatnan públiko di Boneiru, Sint-Eustatius i Saba ta laga di deseá.

“Tin sierto asuntunan ku nos por a palabrá mihó, por ehèmpel ku e dòkternan di kas. Awor nan ta sintá ku hopi mas rekisito i prosedimentu di loke nan ta kómodo kuné. Djarason anochi nos lo papia ku e sektor informalmente riba esei”, van Zandwijk a bisa.

Europeo
Segun e direktor di kuido, tantu e Ofisina di Kuido komo e dòkternan por hisa nan nivel di efisiensia i brinda mas kalidat. Por ehèmpel, van Zandwijk ta haña ku “si dentistanan ta kobra tarifa europeo, e kantidat di tempu ku e pashènt tin ku warda tambe mester kuadra ku normanan europeo.

Tin diferente kousa ku ta pone kos kana struf. Funshonarionan di RCN ta mustra riba e echo ku, pa lunanan largu, Boneiru en partikular a keda sin tuma niun desishon riba asuntunan relashoná ku kuido, i ku debí na esei preparativonan a sufri retraso. Na otro banda di laman, ta te den final di 2010 e legislashon nesesario a keda kla. Tur esaki a stroba un mihó koordinashon entre e partidonan enbolbí, ya ku pa hopi tempu no tabatin e klaridat nesesario pa por a papia na un manera konkreto.

“Nos a dal bai i tuma sierto desishonnan pa kaba, pa por introdusí e sistema nobo ora aña bòltu apesar di tur kontratempu. Mi a kore algun riesgo di mal komunikashon sí, pero mi tin konfiansa ku e sistema di outomatisashon i e kampaña di informashon nobo ku nos a inisiá, lo yuda nos drecha tur kos bèk”, segun Van Zandwijk.