Komo parti di siman di moda na Amsterdam dèndinan antiano, sürnam i afrikano ta modelá nan trahe elegante awe den e 'bataya di moda di sapùr.* Originalemente un sapùr ta un afrikano di porehèmpel Kongo, Ghana òf Nigeria ku ta bisti trahe i sapatu elegante di alta kalidat di diseñadónan oropeo renombrá. Pero awendia tin sapùr tambe den diáspora afrikano. Artista i sineasta Felix De Rooy ta responsabel pa e sho di e sapùrnan.

De Rooy ta splika ku por distinguí tres tipo di sapùr. E promé ta esun ku ta biba den su pais natal na Afrika. Djei tin esun ku a logra sali di su pais i bai biba na porèhèmpel Paris òf New York. 'Pero e klimaks ta si bo bini bèk di Oropa ku bo paña i trahenan. Den bo komunidat bo ta haña e nivel di rèspet di mas haltu.'

Elegansia

De Rooy no ta kere ku sapùrnan ta imitá Oropa pasó nan ta menospresiá nan mes. 'E tin di aber ku ekspreshon di bo individualidat. Tin hende ku ta hasi esei e foko di nan bida.' Edat, tamaño òf tipo di figura no ta importante pa e sapùr. 'Elegansia ta e imágen mas importante pa e sapùr. Mas aleu De Rooy ta komentá ku 'loke ta interesante ta ku nan interpretashon di moda ta hopi biaha un tiki mas distinto, kolorido, atrevido ku e moda di Oropa.' Oropa a deskubrí awor e interpretashon kolorido di sapùrnan. Por bisa ku tin un interkambio awor entre e moda di sapùr i esun oropeo.