Laurindo Andrea (41) ta diseñadó antiano di paña bibá akí na Hulanda. Ounke ku e aña akí e mester a sera su studio di paña na Amsterdam, tòg e no a laga esei demotiv'é di sigui diseñá su kreashonnan eksklusivo. Laurindo Andrea, mihó konosí komo Laurindo Love, tabata di bishita den studio di Aki na Hulanda dia 12 di desèmber último.
 
Na 2006 Laurindo Andrea a habri su studio den sentro di Amsterdam, den un edifisio komparabel ku e pakusnan den 'De Boogjes' na Kòrsou. Pa motibu di e krísis finansiero ela hañ'é ta sera e studio e aña akí i a muda su negoshi pa su kas. "Mi por a keda ku e espasio, pero lo mi a hañá-mi ku hopi mas strès. Mi kier hasi mi profeshon na un manera sano. Na kas e sentimentu i esfera ta mesún kos, solamente ta mas chikí." Andrea a sigui konta ku e situashon no ta unu nobo p'é, paso na inisio di su karera komo diseñadó di paña tambe el a hasi esaki na su kas.
 
Mashin di kose
Laurindo Andrea a bini for di Kòrsou ku algun mashin di kose. E mashin nan aki tin balor emoshonal p'é. Andrea a kumpra e mashinnan akí na Kòrsou i a traha hopi kolekshon ku nan. "Un mashin di kose ta un kos sagrado pa un diseñadó", segun Andrea.
 
Periodo na Kòrsou
Na 1999 Andrea a bai Kòrsou den kuadro di e obra di teater skibí pa Angel Salsbach: 'Deskubrimentu 500 aña di Kòrsou'.
E proyekto aki tabata pa seis luna. A enkargá e diseñadó di paña ku e bistínan i dekòr pa e obra teatral akí. Andrea a keda Kòrsou tres aña i mei enbes di seis luna. Tabatin vários motibu pa esaki. Un di nan tabata ku e por a kompartí su dies aña di eksperensha komo diseñadó di paña tempu ku e tabata biba na Oropa, ku mundu kreativo na Kòrsou.
 
Vishon di moda
Laurindo Andrea a regresá Hulanda na 2002. Na Kòrsou no ta tur hende tabata komprondé loke e ta hasi òf e manera ku e ta traha.
Andrea ta splika ku e ta un 'mode vormgever'. For di un fuente di inspirashon Andrea por diseñá un kreashon i presentá esaki pa medio di un sho di moda por ehèmpel. Kosementu mes ta un parti chikitu di su aktividatnan. Esaki ta splika e diferensha entre un diseñadó di moda i un modista. Kosementu ta esensial pa trabou di un modista, miéntras ku pa un diseñadó di moda e ta mas bien 'on the side'.

Love
No ta pòrnada ku Laurindo Andrea ta mihó konosí komo Laurindo Love.
'Komo diseñadó di moda mi no ta wak solamente e parti di bunitesa djafó. Ami ta bini di paden'. 'Love' ta di idea ku e forsa ku ta bini di paden di un persona, ta hasi e persona ku bo ta di pafó.
E diseñadó antiano di paña ta sigui splika ku e ta aspirá pa tur hende sinti su mes bunita pa medio di moda, sea ku e ta yen, gordo, flaku, grandi òf chikitu.

Renombre
Diseñadónan di renombre na Hulanda Ta konsiderá Laurindo komo un menasa serio pa nan eksistensia. No kabe duda ku nan ta sinti algu asina. Djis kòrda ku último añanan el a diseñá sombre i otro asesorio eksótiko di koló bibu pa algun dama parlamentario di orígen karibense, na okashon di apertura di aña parlamentario i diskurso anual di Lareina riba 'Prinsjesdag'.

Pa mas informashon tokante kreashonnan di Laurindo Andrea, bishitá www.laurindo.com

 

Skucha Laurindo Andrea den kòmbersashon ku Belkis Osepa i Ronald A. Muyden.
.