Maureen Levisson ta un outodidakta, bibá na Den Haag. El a studia pa maatschappelijk werker o sea trahadó sosial. Maureen a traha den diferente proyekto di idioma. Den su trabou ku hóben el a bin deskubrí ku e hulandes ku nan ta papia no ta bon. Esaki a pone ku el desaroyá e 'Kurso Eksito'. Kurso pa yuda Antiano i Arubano papia hulandes bon.

"Pa haña trabou ta importante pa papia bon hulandes i pa pronunsiá hulandes korekto", segun Levisson. El a deskubrí ku tin ku pone tinu riba difikultatnan den e hulandes i a desaroyá e kurso pa Antiano i Arubano ku ta papia papiamentu. "Den e kurso ta siña ku no tin ku tradusí papiamentu literalmente na hulandes", Maureen ta splika. Método di 'Kurso Eksito' ta kombinashon di siña gramátika di papiamentu bon siguí pa siña gramátika di hulandes bon, pa dominá e idioma tambe bon.

Papia hulandes pa por integrá
Tin ku drecha hulandes pa por integrá mas mihó den komunidat hulandes. Pero alabes tin ku dominá papiamentu tambe bon, di e manera aki ta siña otro idioma mas mihó. Algun di e fayonan ku ta hasi papiando hulandes ta ku ta brua artíkulo (de/het) i ta brua dichonan hulandes den otro. Maureen Levisson ta duna lès na grupo di sinku persona.

Si haña pipita di kòmkòmber na boka di mucha....
E ta splika ku na Kòrsou nos a nase ku nos idioma papiamentu. Nos no ta dominá hulandes ora nos yega Hulanda. Dia el a bini e no tabata por a papia esaki bon. Su famia hulandes, famia di su tata, a fors'é papia bon hulandes. "Ora Antiano bini Hulanda i tende hulandes malu ku famia antiano ta papia, e dominio ta keda malu", e ta bisa. Maureen su konseho ta: "no keda solamente den famia paso bo ta ripití hulandes malu i ta keda papia mal hulandes".

Bentaha di e método
Un studiante ku el a laga tèst e kurso a kont'é, despues di dos luna, ku su yùfrou di skol a haña ku su hulandes a bai dilanti. "Ta importante pa papia hulandes bon pa integrá. Pone atenshon na kiko ta bisa i no lubidá e pronunsiashon, segun Maureen Levisson, desaroyadó di Kurso Eksito.