Edwina Martina Molina (53) ta un polítiko kurasoleño na Almere. Señora Molina ta e promé persona di desendensia antiano ku a lanta un partido polítiko na Hulanda. Su partido nobo yama "Almere Voor Iedereen Partij (A-VIP)", esta un partido pa tur hende na Almere.
 

Ku su partido nobo señora Molina ke partisipá na elekshon munisipal na Hulanda dia 3 di mart. Na e momentu aki e ta miembro di konseho munisipal Almere komo Frakshon Molina.

Molina no a disidí di drenta polítika na Hulanda un dia pa otro. E ta splika ku el a prepará su mes pa medio di orientashon i ku el a sigui algun kurso. E polítiko antiano a konta ku el a drenta VVD komo number sinku i a haña 435 voto. Ku e kantidat di voto aki Molina a terminá riba number kuater dje partido ei. "Mi a kue mas voto ku tur e miembronan di konseho munisipal ku tabata sintá ei pa dos periodo, loke ta nifiká mas ku ocho aña.
 
Kredibilidat
Den pasado Edwina Molina a kambia di VVD pa GroenLinks i despues a bira Frakshon Molina. Tabata tin hopi krítika riba esaki. Molina ta di idea ku ta dependé kon bo mira e situashon. E mes ta mira esaki komo un hende ku tin perseveransia, wesu di lomba i ku no ta kore pa responsabilidat. Hulandesnan oropeo ku tin gana di mira mi pafó ta pensa ku mi a kometé 'kiezersbedrog' (engaño elektoral). Molina ta sigui konta ku esnan ku ke mir'é komo miembro di konseho munisipal no ta pensa e kos ei di dje ni nan no ta mir'é asina. "Esnan ku tabata ke mi aden ta atmirámi", segun un Molina orguyoso.
 
Remarkabel
Ta remarkabel ku un Antiano ta bai elekshon pa konseho munisipal na Almere ku su mes partido polítiko. Edwina Molina ta konta ku e reakshonnan ta bastante positivo. Esaki tantu di hendenan ku Molina konosé komo esnan ku e no konosé. "Hendenan ku ta biba na Rotterdam, Arnhem ta bisa 'hesus bo tin brío'. Nos ta bin dia 3 di mart bin yuda bo parti flyer", asina Edwina Molina ta konta.
 
Muhé krioyo
Segun Molina esaki ta muhénan ku no ta flùsh nan yunan dor di tualèt, pero ta aseptá nan i ta karga responsabilidat pa nan. Muhé krioyo ta eduká i ta kai bolbe lanta ku su yu. Na Antia hende muhé ta na kabes hopi tempu kaba.

Kampaña
Edwina Molina ta organisá kampaña na un otro manera kompará ku e partidonan hulandes oropeo. Su partido ta organisá fiesta, debate, 'high tea'(merienda ingles) i 'eettafel'. A-VIP ke drenta konseho munisipal ku 'voorkeurs stemmen' (voto di preferensha). Nan ke logra sinku asiento.
 
Aliado
E partido nobo di Edwina Molina a buska aliansa ku 'Almere Partij'. Molina ta konta ku e ta habrí pa traha ku tur hende, basta tin respèt pa otro. Den pasado Molina tabata a eksperensiá durante reunionnan di konseho munisipal ku e mester para firme pa otronan no kere ku ta payaso e ta. "Mi ta preferá di ta e muhé fuerte den gemeenteraad, ku e payaso di gemeenteraad".