Djaweps 8 di òktober por a mira estreno di e pelíkula Den Gara 2 na Hulanda. Hóbennan boneriano a produsí e pelíkula sin gasta muchu sèn. A tene un funshon úniko na un sine chikí, esta filmhuis Wassenaar. E pelíkula ta un inisiativa di Youth Outreach, un organisashon hubenil establesé tantu na Hulanda komo na Boneiru.

E intenshon ta pa e pelíkula uni hubentut pa evitá nan di drenta mal kaminda. Den Gara 2 ta netamente istoria di un hóben ku ta na punto di bai pèrdí. Richandro Emerenciana (21) di Outreach Nederland ta splika ku tiki hende a tende di e promé pelíkula. "Nos no a promovele mashá."

Boluntario
Ta boluntarionan a traha gran parti di e pelíkula ku yudansa di organisashon i empresanan na Boneiru. "Nos por a fia kámara i outo serka nogoshi." Di e manera akí por a realisá un pelíkula serio sin presupuesto.

E echo ku a pas'é na Wassenaar ta parse sorprendente, ya ku aya no tin masha hóben problemátiko boneriano ta biba. Emerenciana ta bisa ku Wassenaar ta keda sentral pa hubentut di Den Haag i Rotterdam.
 

Guèn
Esnan ku a skibi e guion ta David Martinus i Gabriela Marchena. Nan ta konta ku Omar, protagonista di e pelíkula, ke drent'un guèn. Su amigu Gerald ke impedí e kos ei, komo ku e konosé e guèn djaden. E no ke pa Omar kai den gara di kriminalidat.

Marchena tambe ta aktua komo miembro di e guèn den e pelíkula. "E no ta kuadra mashá ku mi karakter, mi mester a drenta ful den e ròl." Martinus tabata aktivo tras di kortina so: "Mi tabata den e post production." E kos a kai mashá na agrado serka nan.

Martinus i Marchena tur dos ke sigui filma. "Mi ta studia derecho", Marchena di, "Mi a hunga komedia na skol sí, pero gustosamente mi ke desaroyá den e ramo akí. Mi ke sigui un kurso pa siña skibi guion i mi ke sigui lès di aktua." Martinus ta den gremio di media kaba i e tin eksperensha ku vidioklep. "E kos akí ta master Master!."
 

Wak e trailer i skucha relato di Alain de la Mar