‘Konsiderá tur keho komo un konseho gratis’. Esaki minister Edith Schippers di Salubridat Públiko a bisa maneho di hòspital Fundashon Mariadal. E manadatario a termina su gira na e tres islanan BES na Boneiru i tabata testigu di un demonstrashon chikí di pashènt prekupá na entrada di e hòspital.

E pashèntnan tabata karga bòrchi ku teksto kontra, segun nan, e situashon malu den kuido médiko. Minister a papia ku un dama desapuntá, ku tabata keha tokante e kantidat di trabou ku dòkter i enfermero tin, loke ta kousa ku e no ta haña bon kuido.

“Nos ta superando un retraso enorme den kuido médiko na islanan BES, Schippers ta bisa. I esaki ta mashá nesesario. E ora ei bo mester skucha e hendenan ku ta reklamá i ku tin krítika bon. Mi a komprondé ku na radio a hasi un yamada pa bin papia ku mi na hòspital, ke men mi ta mira e demonstrashon aki komo un konsulta.”

Diálisis di nir
Motibu pa e bishita na e hòspital di Boneiru ta apertura di e sentro di diálisis di nir. E binti pashèntnan ku anteriormente mester a bai Kòrsou tres be pa siman pa nan trato, for di awó por haña esaki na nan mes isla.

Señora Jacintha tin 78 aña i durante e apertura e ta na e mashin di diálisis. Último dos aña e tabata fòrsá di biba na Kòrsou, pasobra e biahe tres be pa siman tabata muchu pisá p’e. E ta hari ora minister Schippers yega na su kama. E ta bèk seka su famia na Boneiru, danki na e sentro di diálisis di nir.

Aborto
Segun minister Schippers hende mester kustumá ku tur e kambionan den kuido médiko. Un di nan ta e situashon di aborto. Ku orguyo Schippers ta anunsiá ku hòspital Fundashon Mariendal a pidi pèrmit pa hasi aborto. Pronto e minister lo duna e pèrmit aki, bou di sierto kondishon.

“Kasi mitar di tur embaraso na islanan BES ta terminá ku un aborto. Ilegal. Hulanda no ta fòrsa nada aki, simpelmente ta algu nesesario. Mi ta masha kontentu ku e hòspital aki a saka garganta i ku awor nos por regla e asuntu na un manera drechi. Huntu ku esaki nos ta start un kampaña pa konsientisá hende ku aborto no ta un kontraseptivo. Pasobra hopi hende ta kere asina, i esei no por.”