Otro siman ta tene un deliberashon riba nivel di gobernashon ku Islanan BES, esta Boneiru, Statia i Saba. E deliberashon lo tuma lugá na Korsou. No ta sigur ku Boneiru lo asistí na e reunion akí, pasobra konseho insular di e isla ke bin bèk riba e palabrashonnan hasí ku Hulanda anteriormente. Dia 15 di yanüari di aña benidero lo tené un referèndem na Boneiru.
 

Tantu parlamentu hulandes, komo sekretario di estado Ank Bijleveld di Relashonnan den Reino no ta kontentu ku formulashon di e pregunta ku lo hasi na e referèndem.
Pa pone Boneiru bou di preshon, Hulanda a para saneamentu di debe di 52 mion di florin. Segun Hulanda, e direkshon ku e aktual gobièrnu di Boneiru ta sigui riba tereno di struktura estatal no ta masha kla.

Hulanda ta bisa ku un posishon di salida sano ta nifiká ku mester sanea e debenan, pero ta bisa tambe ku esei tabata mará na e status di Boneiru komo un entidat públiko di Hulanda. Si Boneiru no kier esei mas, anto e ora ei e areglo di saneamentu di debe tambe ta para. No por bolbe poné na diskushon, un base riba kua a sigui traha.

E aktual gobièrnu di Boneiru kier mas outonomia. Pa e motibu ei ta bai tene un referèndem pa laga e pueblo disidí. Na Boneiru ta reina e sensashon ku Hulanda no ta tene kuenta ku deseonan di e isla. Aktualmente Boneiru ta deseá un asosiashon liber ku Hulanda, siendo ku a palabrá anteriormente ku e isla lo bira munisipio ulandes ekstraordinario.

Ank Bijleveld ta spera ku Boneiru ta dispuesto na sinta na mesa pa sigui papia. E isla a formulá un pregunta pa e próksimo referèndem, ku segun Hulanda no ta al kaso. Un asosiashon liber no ta un opshon ku a palabrá. Ank Bijleveld ta konsiderá ku no por bin bèk riba palabrashonnan hasí. 
 

Scarlet Windster ta sigui e desaroyonan polítiko djaserka na Den Haag, relashoná ku desmantelashon di Antia. Belkis Osepa a papia ku Scarlet Windster tokante posishon di Boneiru i e aktitut optimista, pero firme tambe di sekretario di estado Ank Bijleveld.