Awor ku parlamento hulandes lo trata leinan di konsenso di Reino tòg na aprel próksimo, e fecha di 10-10-10 ta parse di ta alkansabel atrobe. Si tur kos kana segun plan, na luna di yüni por tene elekshon pa e paisnan nobo Kòrsou i Sint Maarten.

Despues ku gabinete di Balkenende a kai, gobièrnu antiano di promé minister Emily de Jongh-Elhage a start un lòbi intensivo den direkshon di Den Haag pa e proseso estatal sigui kana. De Jongh-Elhage por wak bèk riba un mishon ku a logra. 'Mi tabatin e heful ku kos lo a bai bon. E karta tabata desisivo pa nan. Nos ta kasi yega.'

Asina mes tur kos no ta sigur ainda, pasó bon mirá Antia ta práktikamente bèk den e situashon ku nan tabata aden promé ku kaida di gabinete Balkenende. 'Esei ta bèrdat, pero si lo a deklará e tema akí kontroversial, nos lo a bai bèk algun aña. Lo a trata e leinan pa mas trempan otro aña', asina promé minister De Jongh-Elhage ta bisa. Pues e ta keda positivo.

Amienda
No opstante e bon notisia, un mayoria den parlamento hulandes tin te ainda problema ku entre otro e Fasilidat Komun di Polis, Sint Maarten komo pais outónomo i Ministerio Públiko. De Jongh-Elhage no ta spera ku parlamento hulandes lo bini ku masha amienda. Pero si esei ta e kaso, e ora ei tantu Staten komo konseho insular di Kòrsou i Sint Maarten mester duna nan opinion riba esei. Pasó ta trata leinan di konsenso den Reino.

VVD ta un di e partidonan ku ainda kier a deklará tratamentu di e leinan di konsenso di Reino komo kontroversial. Nan a kunsumí ku e echo ku no tabatin posponementu pa duna e delegashon parlamentario chèns ainda pa bai kòmbersá na Antia. Parlamentario Johan Remkes di VVD a bisa ku e ta pusta pa un bòter di biña di bon kalidat ku nos no ta bai logra 10-10-10. De Jongh-Elhage ta dispuesto pa pusta kuné. 'Pasó nos a gana kaba. Nos mester logra e kos akí. E proseso akí no ta pèrmití posponementu'.

No tin retraso mas
Dia 20 di aprel próksimo lo mester vota pa e e leinan i 9 di aprel parlamento hulandes ta kuminsá trata e leinan di konsenso di Reino. Awor ku lo tene elekshon na luna di yüni di e aña akí, ta kla tambe ku Glenn Sulvaran, presidente di PAR lo no bira minister di Finansa den e gabinete antiano nobo ku lo keda formá e dianan akí. Sulvaran a deklará kaba ku e kier a tene su mannan liber pa e kampaña di elekson di e partido gobernante mas grandi.