Partido ChristenUnie ta opta pa un kombinashon di eksperiensia i kara nobo na okashon di elekshon pa Tweede Kamer, o sea parlamentu hulandes próksimo sèptèmber. Parlamentario Cynthia Ortega-Martijn lo no regresá. E no ta maint p'e personalmente, pero sí ta duele pa elektorado na Islanan BES.

Hunta di partido a pone e aktual parlamentarionan Slob, Voordewind i Schouten riba e promé tres puestonan. Na di kuater lugá a pone direktor Segers dje instituto sientífiko di partido, miéntras ku e di sinku ta presidente Faber di frakshon di ChristenUnie na provinsha Utrecht. Aki dos siman ta formulá e lista definitivo na kongreso di partido.

Prekupashon
Ortega a sinta den Tweede Kamer for di 2006 i e tabata disponibel pa un puesto riba lista di kandidato. Hunta di partido ta sigui rekomendashon di komishon di selekshon. "Mi tabata den Kamer pa sirbi komunidat", asina Ortega-Martijn a bisa. E ta bisa ku semper e tabata bos di islanan: "Awor esei no por mas." Ta duel e mas ainda ya ku hopi otro parlamentario ku saber di relashonnan den reinu tambe ta bayendo: "E kos ei tin mi bastante prekupá."

E parlamentario di desendensha antiano ta trahando plan pa futuro pa por hasi algu tòg pa Boneiru, Sint  Eustatius i Saba. "Mi ta bai purba di sostené nan djun otr'un forma." Ku su konosementu i kontaktonan den Tweede Kamer, e ta spera por ehèmpel di duna konseho pa atkisishon di informashon i pa splika kon pa tèkel asuntu. Ademas djesei e ta bai rebibá su ofisina di konsulta.

Representante di Reino
Rib'e pregunta si e ta interesá den e funshon di Representante di Reinu na islanan BES, el a basha na harimentu:

"Laga nos warda wak promé kiko Dios ta pone riba mi kaminda." Yen di ánimo Ortega-Martijn ta drenta un fase nobo di su bida, ma e ta bolbe enfatisá ku ta duel e pa BES ku e tin di bandoná Tweede Kamer: "E kos ei ta doloroso."