A pesar di tur e opstrukshonnan, mas i mas kubano ta penetrá redanan sosial riba énternèt. Ast’e gobièrnu kubano ta presentá su mes riba énternèt – masha kuidadoso. Asina e ta hañ’é kara-kara ku su propio súpditonan.

Bíspera di un konferensha grandi na Den Haag tokante liberdat di uza énternèt, ministro hulandes Uri Rosenthal (asuntunan eksterior) a hasi un yamada na henter mundu pa apoyá blògernan i disidentenan di sibernétika. E ministro ta di opinion ku akseso liber pa énternèt ta forma parti dje libertat di ekspreshon, i asina tambe un derecho humano. Spesífikamente, el a nombra Egipto, Siria, Viètnam, Tailandia, i tambe Cuba.  
 
Jorge Landa t’un kubano di 47 aña, ku tin 25 aña kaba bibá na Spaña. E ta bisa di ta enamorá ku Cuba. P’esei, un par di luna pasá, el a disidí di forma un grupo riba Facebook k’un par di amigu di infansia. ‘Facebook tin bida, i k’e diferensha di tempu semper ta posibel pa haña un hende lantá i ku ta konta kon su dia tabata òf kiko e t’ei hasi, òf kon ta bayendo ku su muchanan’, segun Landa.
 
Tur kubano ta haña sumamente importante pa por komuniká ku pariente i amigunan bibando fo’i tera. Binti aña pasá, ora bo bai lag’e isla, b’a kibra tur komunikashon ku bo ser kerinan tambe. Awendia, e distansha ta muchu mas kòrtiku. Landa: ‘Nos t’un grupo di 170 hende i nos ta biba na diferente paisnan: Israel, Spaña, Merka, Argentina, Uruguai i Kòrsou. I un grupo grandi ainda ta biba na Cuba mes. E kos di mas importante ta ku nos ta konsiliá e diferenshanan: tantu ideológiko komo religioso. Mediante portrètnan bieu, anékdotanan, i historianan di pasado nos tabata por eksperenshá e tempu ei dinobo.
 
Buskando kliente
Mask’e akseso pa énternèt ta difisil, mas i mas kubano ta logra penetrá e espasio sibernétiko – prinsipalmente empresarionan. ‘T’un manera mashá efisiente pa promoshoná nos aktividatnan i akumulá kliente’, Esperanza Pérez ta bisa. E t’un muhé di negoshi ku, dos luna pasá, a disidí di presentá su kompania na Havana, Fiestarte, ku ta speshalisá den organisashon di eventonan, digitalmente. ‘Hopi hende ku tin empresa privá ta benefisiá di Facebook.’
 
Akseso pa redanan sosial na Cuba ta ekspandiendo i e aplikashonnan ta mashá diverso: duna i risibí informashon, ofresé sosten, hasi negoshi, sera konosí ku hende, lokalisá amistatnan di pasado, i hopi mas. Luna pasá tur hende por a sigui e konfrontashon pisá k’a tuma lugá riba Twitter entre Mariela Castro, yu muhé dje presidente kubano, i e skibidó di blòg i disidente Yoani Sánchez. Tabat’e promé enkuentro di Castro riba Twitter, i klaramente el a spanta dje echo ku aki hende por ophet’e gewon. 
 
‘Tabat’un gran sorpresa’, Sánchez ta bisa. ‘Mi ta kere ku ta p’esei redanan sosial t’un inbento asina importante: nan ta plat, no tin herarkia, aki nos tur ta igual. E interkambio di palabra ku Mariela tabata mashá revelador; den e Cuba berdadero nos no ta igual, pero den espasio sibernétiko nos tur ta papia e mesun idioma, face to face, i nos ta haña nos mes den un situashon kaminda sí nos mester skucha otro’, segun Sánchez. Den su yamada pa apoyá disidentenan sibernétiko, ministro Rosenthal eksplísitamente ta nombra e weblog di Sánchez.
 
Akseso limitá
Pero sigur no tur hende na Cuba por aksesá énternèt. Gobièrnu ta duna pèrmit na profeshonalnan ku mester djesaki pa nan trabou. Estranheronan ku ta biba rib’e isla i e hotèlnan grandi tambe ta haña pèrmit pa tin un konekshon di énternèt. Un par di kubano a desaroyá nan propio método pa krak konekshon i fia frekuensha di transmishon di otronan.
 
´Mi kompatriotanan ta mashá kreativo, i riba merkado pretu ta bende konekshonnan di énternèt di krak òf hendenan ta uza sms pa publiká mensahenan riba redanan sosial, manera ami ta hasi mediante Twitter. Tambe tin hende ku ilegalmente ta bende konekshonnan komersial di énternèt, òf ku ta paga e prèisnan haltu na hotèl pa konektá ku énternèt: un ora ta kosta entre 6 i 10 euro’, segun Sánchez.  
‘Si e generashon di hobennan aki haña akseso p’e redanan sosial, lo bini yen di diferente strom. Mi ta kere ku si nos kuminsá ‘praktiká’ k’un Cuba virtual, e enkuentronan den e Cuba real lo ta muchu menos violento, menos troumátiko. Ta mi idea k’e reda sosial lo t’un tipo di práktika di ‘kon pa t’un (bon) siudadano’ ku nos por implementá despues den bida real’.
 
Ku doló gobièrnu kubano ta wak kon e popularidat dje redanan sosial ta krese. Ministro Bruno Rodriguez (asuntunan eksterior) ta boga p’un strategia polítiko den kua lo desaroyá ‘redanan sosial independiente, p’asina ofresé un alternativa berdadero, i libra dje diktadura di kompanianan merikano manera Microsoft i Apple’. Un alternativa kubano p’e Facebook merikano ta RedSocial, un kreashon dje gobièrnu kubano, ku tin mas ku 7000 miembro. Pero bo por ‘log in’ solamente fo’i Cuba.