Richard Rifaela tin mag di keda na Stedelijk Dalton Lyceum na Dordrecht te ku fin di aña eskolar. Rifaela ta traha na e skol sekundario via di un agensia di trabou. Hefe di e agensia 'Uitzendbureau Buurt Service Team', Bertus Hanzenbosch, a logra pa Richard keda te ku zomervakantie.

Alumnonan di e skol tin ku kontribuí ku e montante simbóliko di 500 euro pa yuda paga gastunan. Esaki ta nifiká ku kada alumno ta aportá ku 50 sèn. Entre tantu ta buska otro trabou pa Richard. Jan Vlot, direktor di Dalton Lyceum ta kontentu ku e solushon aki i ta lamentá ku e skol no tin mas fondo pa tené na trabou.

Krísis ekonómiko
Manera nos a informá anteriormente, e krísis ekonómiko ta reina ainda na Hulanda. Konsekuensia di esaki ta ku hopi hende ta pèrdè trabou. Richard Rifaela ta traha komo conciërge na Dalton Lyceum na Dordrecht. Pa falta di fondo e skol ta kore ku Richard, despues di a traha 10 aña einan. Alumnonan di Dalton Lyceum a organisá un wèlga pa e conciërge antiano.

"Ta un kos tremendo, un kos nunka bisto", asina Richard ta reakshoná riba e kantidat di alumno ku a wèlga p'é. El a keda asombrá ku asta alumnonan bieu a bin skol pa partisipá na e akshon. 'Aki bo ta mira ki balor bo tin', e ta sigui bisa. E adolesentenan ta kontentu ku Rifaela. 'Nos ta sigui ku nos protesta te ora ku e por keda', asina Merel van Gils, un alumno di 15 aña di edat, a bisa.

Segun direktor di e skol, Jan Vlot, e echo ku ta bai retirá e conciërge no ta bisa nada di e apresio ku tin pa Richard. Vlot a bisa: 'Mi por revoká e retiro solamente si pone mas sèn disponibel. Esaki lo no sosodé'. Pero awor ku asina tantu hóben a wèlga, e ta kambiando di idea. El a splika ku no ta e so ta tuma desishon. Siman pasá el a bisa Richard ku tin un chèns chikí ku tòg e por keda traha na Dalton Lyceum.