E wikènt akí representantenan di Boneiru, Sint Eustatius, Saba (BES) i di Aruba, Kòrsou i Sint Maarten a sera un ‘akuerdo Ros-Oraño’ (Pink-Orange akkoord) ku COC Hulanda. E akuerdo ta pa kooperashon riba tereno di pone prioridat i formulá strategia pa emansipashon di e komunidat homoseksual riba loke antes tabata Antia.

E envolvementu di COC Hulanda tin di aber ku entre otro kambionan den reino. Banda di e grupo grandi di imigrante homoseksual for di Karibe pa Hulanda e islanan BES a bira parti di e konstelashon estatal hulandes.

Konotashon kultural
Segun Koen van Dijk, direktor di COC Hulanda, e lucha pa emansipashon riba e islanan ku antes tabata forma Antia no ta diferensiá for di esun den e otro paisnan kaminda COC ta aktivo: “Ta trata di hende ku ta nase den un famia heteroseksual i ta bin haña sa ku nan ta otro. Nan ta haña nan ku un struggle i no konosé traspaso di símbulo i tradishon. Nan tinku buska moda di anda ku esei, ku tur e kontratiemponan ku nan ta haña den esei. Ademas e lucha akí ta tuma lugá den un konotashon kultural spesífiko. Ku esei bo mester tene kuenta pa ta efektivo”.

Imponé
E último ei Van Dijk ta haña kompliká den e reino. “Di un banda”, e direktor di COC ta bisa, “bo mester aseptá ku e pakete di derechi ta fihá pa lei. Bo no por skohe djis un parti di e pakete. Di otro banda nos mester respetá e echo ku ta traha lei semper den un konteksto sosial. Riba e islanan BES e kasamentu di homoseksual a bini di afó i a wòrdu imponé. Loke no ta kita sí ku e lei tei awor.”

E lucha pa derechi igual ta ekstremadamente importante segun Van Dijk pero loke finalmente tin mas tantu influensia riba e bida di homo- i lèsbonan ta e grado di aseptashon ku nan ta topa den nan besindario: “no ta semper bo mester konopá e luchanan ei muchu na otro”.

Ròl
E ròl di COC den e relashon di kooperashon ta unu fasilitario. E movimentu akí pa homoseksual ta eksistí for di 1946 na Hulanda. Traspaso di konosimentu ta un pilá importante. “Nos tin hopi eksperiensia i a desaroyá un ret grandi, di moda ku nos por hiba agèndanan di aki pa foronan internashonal manera Merka i e Konseho di Europa.

Miedu pa imperialismo kultural Van Dijk no tin. “Esei no ta nos estilo di kolaborashon. Ademas homo- i lèsbonan ku a lanta i ta biba akinan konosé e situashon muchu mas mihó ku nos. Nos no ta bini akinan ku un mapa i bisa: ta asinaki kos tinku bai. Nos ta kere sí ku – huntu ku nos partnernan aki – nos lo por yega na fondo na Den Haag pa yuda e movementunan aki.”