Analista di polítika, dòktòr ingeniero Gilbert Cijntje ta pronostiká ku MFK, PS i MAN lo yega na un Bestürskolezje nobo konsistiendo di seis diputado. 'Manera mi ta komprondé i bo ta tende aki aya, probablemente nan lo logra pa forma un bestürskolezje di seis diputado.' Cijntje ta indiká ku den e kaso ku e partidonan no logra un gobìernu di seis diputado, na lo rekurí nan unu di tres. 'Pa asina nan no kometé suisidio polítiko.' Kon ku bo bòlt'e, Kòrsou lo tin un bestürskolezje nobo entrante mayan pasó asina lei di Konseho Insular ta preskribí.

Mas aleu Cijntje ta mustra ku en teoria ta posibel pa despues di tempu kambia e diputadonan ku keda nombrá awor. Esei por sosodé na momentu ku Konseho Insular ta deseá esaki. 'No tin niun opstákulo pa esei.' No ta asina ku e diputadonan ta bira outomátikamente minister di pais Kòrsou. 'Lei ta preskribí ku si 10-10-10 kontinuá, e 21 miembronan di Konseho Insular ta bira e promé 21 miembronan di parlamento di Kòrsou.' E kantidat di minister pa pais Kòrsou ta 9. Pero esei no ta nifiká ku lo bini 9 minister. 'Por ta un minister ta tuma 1 òf dos kartera adishonal.'

Konferensha di Mesa Rondó
Mayan e miembronan nobo di Konseho Insular ta huramentá serka gezaghèber Lisa Dindial. Djei lo mester vota tokante e areglo di estado (Konstitushon). 'Probablemente si mi tende e zonidonan bon, e lo keda aseptá ku un mayoria amplio. Djei mester disidí lihé ki'ta e posishon di e partidonan pa ku nan asistensia na Konferensha di Mesa Rondó.' Despues ku e konseho disidí esei, Bestürskolezje mester reuní i apuntá un delegashon pa representá Kòrsou na e konferensha.