WILLEMSTAD – “Churandy Martina ta riba bon kaminda pa logra bon durante Weganan Olímpiko na Lònden otro luna.” Eric Martina, tata orguyoso di e atleta kurasoleño di 27 aña ku na yüli lo sali pa Hulanda na Lònden, tin hopi konfiansa.

Tata Martina niun momento no ta duda forsa di su yu. Su último logronan ta konfirmá e konfiansa aki. Churandy siman pasá na New York a mehorá e rekòrt hulandes riba 200 meter sprent ku 19.94 sekònde. I djadumingu pasá el a defendé su título riba 100 meter sprent durante kampeonato hulandes di Atletismo na Amsterdam ku un tempu di 10.22 sekònde.

Yama tur dia
“Churandy ku mi ta yama otro na telefon tur dia, asta si e tin ku kore. E ora ei e ta yamami promé ku kareda i mi ta papia kuné pa dun’é konfiansa”, e tata ta bisa. “Por ehèmpel mi ta bis’é ku e mester fókùs i riba final. E mester kore ku final so den su mente.”

Despues di e karedanan tata i yu ta yama otro pa kompartí desapuntashon òf éksito. “Último bianan Churandy tabata masha kontentu ku su resultadonan i mi ta kompartí e orguyo ei kuné. Tin be mi ta dun’é feedback di loke mi a mira i kiko e por traha riba dje ainda segun mi”, segun e tata ku un tempu e mes tabata kore distansha largu ku éksito.

Training
Na kaminda pa Weganan Olímpiko pa e 100 meter sprent Churandy mester di forsa físiko. “Aktualmente e ta pasando hopi tempu den e training di forsa pa traha riba su múskulonan nesesario na start”, Eric Martina ta konta.

Segun su tata e ta train espesialmente ku su kompatriota Brian Mariano òf otro sprenter ku ta den e pais kaminda e tambe ta. E desafio di mas grandi ta e tenedó di rekòrt mundial hamaikino Usain Bolt.

“Bo mester sa ku Churandy i Usain ta masha bon amigu”, Churandy su tata ta konta. “Churandy ta rekonosé Usain su forsa i e sa ku e konfrontashon lo ta pisa, ma e no tin miedo di Usain, al kontrario, e tin gana di kore kontra dje.”

Wak televishon
E chèns ku Churandy su mayornan lo ta Lònden pa enkorashá nan yu durante Weganan Olímpiko ta masha chikí. “Aktualmente nos tin falta di personal na kazèrne di brantwer, ke men mi no ta kere mi por bai”, Eric Martina ta konta.

“Ma naturalmente nos ta bai sigui Churandy na televishon si. Estilo antiano, ku barbekiú grandi i hopi bibida. Trese bo protekshon di orea pasobra ami t’esun ku ta bai grita mas duru ku tur.”