Mester regla derecho di prezo na islanan BES mas mihó. Esaki Cynthia Ortega-Martijn di ChristenUnie, ku djamars 17 di yanüari a hasi pregunta den parlamento hulandes tokante esaki,  ta haña. E ta preokupá, entre otro, pa e trato di prezo sabano i statiano ku awó ta sinta nan kastigu den prizòn na Boneiru.

Ortega-Martijn i su kolega Carola Schouten ke sa si ta garantisá derechonan di e prezonan. Por ehèmpel, e no ta komprondé ku ta trata kaso hudisial di statiano i sabano na Boneiru, ku ta keda asina leu geográfikamente di Saba i Statia. “No ta eksistí un buelo direkto, i esaki ta pone ku pa famia di e malhechornan i e víktimanan ta kasi imposibel pa partisipá na e hurisdikshon”, segun Ortega Martijn.

E parlamentario ta preokupá ku e asina yamá ‘first offenders’ lo kai mas abou bai den kriminalidat pisá. Asina el a tende relato di hoben ku pa promé be a bini den kontakto ku hustisia i ku ta será huntu ku kriminal pisá.

Lokashon di prizon na Statia
Ortega-Martijn su atenshon ta bai tambe pa tur e beheit ku tin tokante e lokashon di un prizon nobo ku mester konstruí na Sint Eustatius. E ta pidi aklarashon tokante esaki i e ke sa si ta posibel ainda pa kambia e lokashon. Tambe e ke sa si den e futuro prizon, e kantidat di sèl lo ta sufisiente pa pone tur prezo di Saba i Sint Eustatius.

“Esaki ta un ehèmpel klásiko di problema ku ta resultá for di ekambionan estatal di 10-10-‘10”, segun e polítiko. ChristenUnie ke pa minister di Asuntunan Interior i sekretario di estado di Hustisia investigá e krítika riba e sistema hudisial na islanan BES i tuma akshon si resultá ku esistema no ta kumpli ku eksigenshanan nashonal i internashonal.