Un skol di baile no tin mag di obligá alumnonan ku kabèi di peper pa kana kune stèif halá n'un dundu. Esaki a a sali na kla despues di veredikto di CGB (Commissie Gelijke Behandeling), o sea Komishon Trato Igual, ku a publiká  siman pasá.

Aña pasá mama di un mucha muhé di 12 aña a entamá e kaso kontra un skol di baile na Den Haag. E instituto a stipulá ku kabèi di bailarin di balèt klásiko mester ta halá n'un dundu. E alumno en kuestion tin kabèi di krin i mayoria biá e ta peñ'é na flèktu.

Dundu lizu

E mucha muhé tabata bin lès di baile ku su kabèi di flèktu mará n'un bòl. Ta p'e motibu akí e skol di baile a ning'é akseso na lès tanten ku e no hal'é n'un dundu lizu. E alumno i su mama ta bisa ku e ta tuma muchu tempu pa gana e kabèi di peper den un dundu lizu sin flèktu e. Nan a ofresé sí pa hasi e kabèi pa okashon spesial, manera presentashon i evento ofisial di e skol di baile. Pero esaki no a satisfasé demanda di e instituto ya ku otro alumno ku kabèi di krin sí lo ta kumpli ku e normanan preskribí. 

Eksklushon
E skol di baile a argumentá yùist den su defensa, ku no ta hasi distinshon di rasa ya ku e regla ta konta pa tur hende. Pero Komishon Trato Igual ta husga ku e skol ta hasi distinshon mashá bon, anke indirektamente, ya ku 'si bo tin kabèi di peper e ta ligá na bo desendensha'. A instituí e Lèi General di Trato Igual netamente pa kombatí eksklushon innesesario.