E siman akí a entregá un rapòrt na Minister Klink di Salubridat den kuá ta konkluí ku e kantidat di Hulandes ku sobrepeso ta sigui subi. Na 2005 tabatin un promedio di 40 porshento di adulto ku sobrepeso, awor e porsentahe ta 46. Tambe e kantidat di hende ku obesitas, esta sobrepeso ekstremo, a subi di 10 pa 11 porshento. Layla Dortalina, yu di Kòrsou bibá na Den Haag, tabatin obesitas i a disidí di redusí su stoma mediante un operashon di baipas, ku ta parti stoma den dos espasio. El a tuma e desishon drástiko akí debí prinsipalmente na kehonan físiko ku e tabatin. El a logra baha sesenta kilo. Dortalina ta bisa ku den seno di Antiano na Hulanda tambe e ta wak hopi hende ku sobrepeso.

Baipas di stoma
Redukshon di tamaño di stoma i hasi hopi deporte ta é manera pa Layla Dortalina dil ku problema di peso dimas. Layla ta di orígen kurasoleño i den ún aña el a baha 60 kilo. E intenshon ta pa pèrdè un total di 75 kilo. Dortalina ta riba e bon kaminda pues ku redukshon di su stoma. El a operá na febrüari di 2008.
Ta un medida ku mas i mas hende ta opta p'e ya ku e kantidat di pashènt, ku ta laga pone baipas (gastric bypass) na stoma pa motibu di sobrepeso, ta kresiendo eksplosivamente. Si na aña 2000 a someté sinkushen hende na un operashon, aktualmente e kantidat akí a krese ku 3000 i piku pashènt.

Layla Dortalina ta biba na Den Haag. Den pubertat el a kuminsá bira gordo i tempu k'el a yega Hulanda na 1997, e tabata pisa 110 kilo. Na febrüari di 2008 su peso tabata 180 kilo. Un peso asina por trese problema manera falta di rosea, batiment'i kurason i reumatismo, tur ta posibel motibunan pa operá, pero e por ta di índole kosmétiko tambe, segun Dortalina.

Sensashon inkómodo
"Serka'mí tabata mi salú i e inkomodidat. Mi no tabata sintími dushi." Aparte di esei el a haña lipo-udema, o sea ku su kurpa a kuminsá yena ku fèt i vògt. Ounke ku ta bisa ku e kos akí ta hereditario i ku e no ta bin di komementu dimas, e tabata un di e motibunan sí pa baha di peso. Liposukshon, o sea drenahe di fèt no tabata e solushon p'e, ya ku e lo mester a tuma lugá di un forma spesial debí na su malesa: "E ta kosta 30.000 te 35.000 di euro i seguro no ta paga."

Despues ku a samin'é Dortalina a opta p'un operashon di baipas na stoma. Ora pone e bant rondó dje stoma, e ta partié na dos. Ta sobra ménos espasio pa apsorpshon di kuminda i e paso pa tripa ta bai mas slo. P'e motibu akí e sensashon di hamber ta disparsé pa gran parti. A kompensá gastu dje operashon akí sí komo ku Layla tabata sufri di 'obesitas mórbido', "pues un kaso serio di sobrepeso."

No ta kuestion di un dieta riguroso despues di operashon. Dortalina por kome tur kos, pero porshon mas chikí sí. Ta fèt i suku so e ta laga para. "Básikamente mester traha riba bo kustumber di kome: tres kuminda prinsipal i tres kos di tene boka kontentu"(snèk). Fuera di esei e ta hasi deporte. Di tur manera e ke baha 75 kilo, antó mas ku esei. E ke pisa bou di shen kilo.

Skucha konsehonan di Layla Dortalina den kòmbersashon ku Belkis Osepa