Ta presentá e buki ‘Kwelgeesten rond de kapokboom’ (Zumbi rònt di e palu di katunbòm) den Teatro Luna Blou na Kòrsou djaweps dia 10 di novèmber. Algu spesial di e buki akí ta ku e ta bini ku ‘Quick Response codes’ (QR-codes) ku por usa pa wak un pelíkula kòrtiku tokante e promé parti di e buki via smartphone.
Segun e outor Charlotte Doornhein: “Ta bon pa hóben lesa. Pakiko no stimulá nan drentando den nan mundu digital yen di aparato i aplikashon moderno?” P’esei mes, e ta kontentu ku su aporte na e siman di buki pa mucha ku ta dura di 5 pa 16 di novèmber 2011 na Kòrsou.
Crossover
Teksto di e buki i e video artístiko korespondiente di e artista plástiko Frouwkje Smit ta apoyá otro den e kuenta tokante un palu di katunbòm spesial den e área natural di Roi Rinkon na Kòrsou. Den e novela ‘crossover’ akí tin entre otro: herensia indjan, lugánan ku energia spesial i ala di gai kòrtá.
Doornhein ta haña ku e lektornan di su buki mes por skohe pa komprondé i interpretá e kuenta di hopi diferente manera. Pero e ta deskonsehá pa lesa e kuater sekshonnan di e buki di 110 página akí den un solo lesá: “Tin hende ku a hasié i a bisa ku nan a haña biramentu di kabes”.
16+
Zumbi, un altá di sakrifisio, un revòlver i potrèt di kachó morto ta pone ku e buki no ta apto pa lektornan muchu yòn. Segun e outora, lektornan di diesseis aña p’ariba sí por riska lesa su obra.
Pa e grupo meta akí, Diana Lebacs, Laura Quast i otro artistanan di tarima di Kòrsou i Hulanda lo presentá ‘Kwelgeesten’ djaweps di nueb’or pa dies or di mainta na Teatro Luna Blou. Entrada ta grátis i despues di boutismo di e buki, na enkargo di Sonia Garmers i Rina Penso, muchanan di skol por sera konosí mihó den kurá di e teatro ku tur e eskritor-, aktor- i artistanan presente.
Email this Article
Printer-friendly version
Post new comment