Antiano i Arubanonan bibá na Hulanda por lesa for dje luna akí e promé buki di kòmeks na Papiamentu yamá Kaya Kayente. Antiano George Michel ta outor i tambe pintadó dje karikaturanan den e buki di kòmeks. Inspirashon pa produsí Kaya Kayente ta bin dje esena di Dancehall i tambe e afan pa komuniká ku prinsipalmente hóbennan, segun George Michel.

George Michel ta outor i tambe pintadó dje buki di kòmeks Kaya Kayente. E ta haña ku un buki di kòmeks ta mas fásil pa hóbennan lesa i nan ta rekonosé sierto situashonnan den karikaturanan ku el a pinta. "Hóbennan no ta lesa fásil. e idea pa e buki mi tin hopi aña for di na Kòrsou. Ku e buki di strep akí mi ke komuniká i trese sierto mensahenan."

Dancehall
E promé buki di kòmeks na Papiamentu ta konta un istoria di un mucha muhé ku ta anda den e esena di Dancehall i di otro banda tin responsabilidat pa su ruman chikí, segun Michel. "E istoria ta lanta kuriosidat. I hopi ta ansioso pa wak e di dos edishon."

Vulgar
Bastante karikatura den e buki di kòmeks ta sin mashá hopi paña na nan kurpa i tambe ta usa sierto palabranan vulgar. Segun Michel el a usa palabranan ku ta komun bou di hóbennan antiano. "Ta idioma ku Antianonan ta usa. E palabranan ta hopi real p'asina nan por komprondé loke tin skibí mihó."

Skucha entrevista ku Belkis Osepa a hasi ku outor George Michel.