Konvershon, trabou di boluntario, kombatimentu di pobresa, speransa pero tambe un mancha grandi di abuzu den iglesia katóliko: tur esaki brudernan di kongregashon di Dongen a eksperienshá. Despues di 64 di servisio dia 29 di yüni nan ta tuma despedida definitivo di nan Kòrsou stimá.

Piet Smetsers (84), Emanuel Hölsgens (81) i Theo Derksen (78) ta mira bèk riba un ‘tempu bunita pero konmovedó’ riba e isla. Ku doló den nan kurason nan ta laga nan rumannan den kongregashon Ton Flinkenflögel i Franklin Clemencia atras komo e únikonan.

Gran kontribushon
For di promé ku Segundo Guera Mundial gobièrnu a pidi e brudernan bin traha den e sentro sikiátriko, miho konosí awendia komo Caprileskliniek. E ora ei a bini guera. Tabatin hopi nesesidat di trahadó den ayudo sosial. “Nos no tabatin basta hende di Kòrsou pa akohida di hóben problemátiko. Ta manera di mes a pidi e brudernan pa yuda den esaki i asina a lanta Gouvernements Opvoedings Gesticht (GOG)”, asina bruder Clemencia ta konta.

Despues di GOG e brudernan a traha den diferente proyekto di desaroyo manera e proyekto ‘Drecha kas’. Tambe nan a lanta e kas di kuido di hòmber ansiano Ricardushuis i nan a keda yuda hende ku ménos moda via nan propio fundashon ‘Kab’e Kas’.

Ta duel Direktor Ed Leonora di Fundashon Birgen di Rosario ku e brudernan ta bai, ma e tin speransa pa futuro. “E brudernan a lanta hopi kos pa hubentut i sikiatria riba e isla. Esei nan ta laga pa nos i ta na nos pa kontinuá. Esaki nos lo hasi sigur.”

Abuzu seksual
E aktonan filantrópiko di e brudernan ta forma un kòntrast skèrpi ku e abuzu seksual ku den e mesun tempu a tuma lugá seka fraternan di Tilburg na Kòrsou. “Kisas den nos kongregashon tambe tabatin bruder kulpabel, esei mi no sa”, bruder Hölsgens ta atmití, “komo grupo nos ta sintié sí, i nos ta eksperiensh’é komo masha mal propaganda pa nos.

“Den e tempu nos a papia hopi tokante e asuntu, ora ku el a sali na kla. Nos tabata haña e asutu teribel i no tin palanbra pa drech’é. Espesialmente pasobra ta trata di hende religioso i nan tin un posishon di konfiansa”, segun bruder Clemencia. “Úniko kos ku nos por hasi komo grupo ta di pidi despensa, pasobra ounke nos komo individuo no a hasi nada malu, nos ta sinti nos responsabel sí pa nan aktonan.”

Partir c’est mourir un peu
Ounke ku na Hulanda ta ward’é mihó kuido i akohida ku por dun’é aki na Kòrsou, bruder Hölsgens ta desapuntá ku e tin ku bai bèk. “Tur e añanan bo a traha aki i awor bo tin ku bai. Nan sa bisa ‘bo no mester planta un palu bieu di nobo otro kaminda pasobra e ta muri’. Pero nos a bini pa pueblo i asina nos ta bai tambe. Partir cést mourir un peu.”