Gobernador di Antia ta hung'un wega ku Hulanda. Esaki segun Hero Brinkman, miembro di Tweede Kamer pa partido PVV. Brinkman ta referí na desishon di gobernador Frits Goedgedrag pa anulá e referèndum na Boneiru. E parlamentario a pidi un debate di urgensia ku sekretario di estado pa asuntunan di reino i ta haña sosten pa esaki di SP i di Rita Verdonk, miembro independiente den parlamentu ulandes. Di e forma aki tin un mayoria pa e debate.

"Nos tur sa ku den asuntunan importante, gobernador ta haña su instrukshonnan di gobièrnu ulandes. Ami ta sospechá e sekretario di estado di a abusá di su poder", asina Brinkman ta bisa. El a ripará ku regularmente Bijleveld a mustra riba e echo, ku semper tin e posibilidat ku gobernador no ta duna pèrmit pa e referèndum. "Antó pa straño ku e por parse, el a sosodé milagrosamente. Ami ta mira influensha di gobièrnu ulandes den esaki."

Abusu di poder
Segun Brinkman, e sekretario di estado semper tabata masha franko."Semper el a bisa ku Bonerianonan no tin derechi riba un referèndum i ademas e ta haña ta pantomina ku nan ke tene un konsulta popular. E ta kompletamente kontra." Brinkman ta bisa ku asina tambe a pasa ku Statüt, esta ku gobièrnu ulandes a maluzá su poder e tempu ei.

Argumentashon swak
Brinkman ta suponé un ke otro komparando e semehansa remarkabel di e argumentashonnan di tantu e sekretario di estado komo di e gobernador. "Un di e motivashonnan ta súmamente swak. Ami sí no ta kere den kasualidat."
Brinkman ta haña ku Bonerianonan tin derechi riba un referèndum honesto. "Ami ta haña ku si Antia, enkabesá pa gobernador, no por sòru pa esaki anto e or'ei ta nos mester hasié."

Tiki ánimo pa un debate di urgensia
Partidonan di koalishon PvdA i CDA no tin niun tiki interes den un debate di emergensia. Nan ta di opinion ku e konsulta popular ta un asuntu di Boneiru i di Antia. Partidonan di oposishon VVD i Groenlinks tambe ta kontra un debate di urgensia. "Nan no ke sostene esaki, pasobra un referèndum por ta un peliger grandi pa e fecha 10-10-10. Nan sa ku un mayoria di pueblo boneriano lo a vota pa un asosiashon liber i esaki lo por bruá hinter e trayekto di lei. Ta p'esei e partidonan grandi ta kontra un referèndum", segun Hero Brinkman.