Un grupo di boneriano a probechá di bishita dje delegashon parlamentario ulandes pa protestá kontra e sirkunstanshanan di bida, ku ta empeorando na e isla. Ta un par di ora so e presidentenan di frakshon a pasa na e isla. Tabata un bishita di dòkter komo ku a plania un debate pa tuma lugá djasabra awor na Den Haag. Ta trata djun debate enkuanto Kumbre oropeo.

E parlamentarionan a hiba kòmbersashon na ofisina di gobièrnu, no ku Kolegio Insular so, sino tambe ku representantenan di hubentut di vários organisashon. Dos hóben ku a risibí e oportunidat pa papia ku e lidernan di frakshon ulandes ta Chendrik Janga i Charles Martijn, anke ku e tempu tabata bastante breve, pues no por a bisa masha kos.

E promé aña komo munisipio ekstraordinario di Hulanda, e hóbennan a pasa malu. "Hendenan ta hòrtando kuminda den supermarket, kemen kos no ta bai niun tiki bon, dolarisashon ta muchu karu, a kambia prèis na florin pa dòler." E hóbennan no por bisa ki ekspektativa nan tin. Loke sí nan ta mira ta ku 'e problema lo sigui pa mas tempu, futuro no ta mashá briyante, pero mester dal bai ku bida i hasi nos bèst.'

Protesta
E presidentenan di frakshon di Tweede Kamer a keda kontentu ku e reunion di mucha yòn. "Nos no a bai un reunion asina na niun otro isla, e hóbennan ta duna hende energia," asina Gerdi Verbeet, presidente di Tweede Kamer a bisa ku mashá entusiasmo. "Dushi pa tende kiko nan ta hasiendo i ki plan nan tin."

Ora ku e lidernan di frakshon a bandoná ofisina di gobièrnu di Boneiru, desenas di manifestante tabata pará ta warda nan, ku pankarta di protesta. Nan tabata skander lema. E presidentenan di frakshon a tuma tempu pa kòmbersá ku nan.

Partidario
Un boneriano, prekupá sobretodo ku e leinan ulandes pa eutanasia i matrimonio homoseksual, a topa inesperadamente ku un partidario: parlamentario kristian Kees van der Staay. "Kisas lo bo keda asombrá, pero nos di SGP tambe ta lucha kontra e kosnan akí," asina miembro dje partido kristian reformá a duna di konosé. "Mi no ta den gobièrnu, ma mi ta representante di pueblo sí, i dibo tambe, asina ta ku lo mi hib'e rospondi Den Haag."

Cedric Soliana pará na Pasangrahan tabata un di e manifestantenan mas ferviente. El a grita e delegashon parlamentario: 'Nan mester duna nos lokual ta di nos, ta p'esei nos t'aki fó, bo no ta interesá den e bonerianonan, sino den nos teritorio, pa bo hañ'é, nos mester ta morto.'