Ku sierto tenshon tabata warda bishita di Reina Beatrix na Boneiru. Finalmente e bishita a resultá di ta unu kariñoso i relahá, no opstante e protestanan. Sin duda Lareina a gana na komplasensia ora el a tuma su tempu pa papia un ratu ku e manifestantenan i risibí un petishon.

Durante e resepshon ofisial pafó di Ofisina ehekutivo i ku tabata na enkargo di gezaghèber Glenn Thodé, tabatin algun desena di manifestante ku bòrchi i spanduk meimei di e públiko. Momentu ku e diferente himnonan tabata toka nan tabata hisa e bòrchinan, algu ku e kompania royal no por a keda sin ripará.

Faktor vinkulante
Despues di a sera konosí ku Kolegio ehekutivo i Konseho insular, Thodé a tene un diskurso pafó dje ofisina. E no a teme pa laga su oudiensia komprondé kla, aunke no eksplísitamente bisá, ku no ta bayendo bon ku Boneiru. “Su Mahestat ta e faktor vinkulante”, el a bisa Lareina, yamando e pueblo boneriano un pueblo dividí. Bèrdat ta ku Thodé no tabata kontentu ku e publisidat negativo riba Boneiru debí na e protestanan. Korto tempu promé ku e bishita di Lareina el a anunsiá ku l’ e no kaba su término i ku l’e baha entrante 1 di yanüari 2012.

Despues di e parti ofisial Lareina, prens i prinsesa a pasa banda di e públiko ku tabata konsistí di algun shen persona. Algun berdadero fanátiko di Kas Oraño, Bonerianonan komun i koriente huntu ku e grupo di hendenan málkontentu a lain òp na e bareranan pa kontené hende. E manifestantenan tabata agrupá na final i ora e komitiva a yega aya, nan a para ketu.

Franko
Líder di manifestantenan, Cedric Soleana, a papia algun minüt ku Reina Beatrix i a entreg’é un karta. Lareina a bisa ku e ta bai lesa e karta, pero a mustra ariba ku, den esaki, e no tin ningun autoridat. Sí el a indiká di ta kontentu ku frankesa dje manifestantenan i di tur manera el a deseá Boneiru ‘tòg un futuro próspero’. Prens Willem-Alexander a añadí ku e ta spera ku na un siguiente bishita e lo por papia di un progreso.

Minister Piet Hein Donner di Asuntunan Interior i Relashonnan den Reino a primintí di kontestá e karta di Soleana. Ku esaki, indirektamente el a reakshoná riba e keho di e manifestantenan ku nan no a haña kontesta riba nan kartanan anteriormente.

Rincón
Seguidamente e komitiva royal a bai Rincón pa bishitá parke kultural Mangazina di Rei i skol Watapana. Na e skol akí pa enseñansa spesial tambe a habri e aña nobo di e organisashon di boluntarionan BON DOET, un vershon boneriano di NL DOET ku ta un inisiativa di Fondo Oraño.

Atardi Reina Beatrix i prens Willem-Alexander a hasi un paseo den boto den e pal’i mangelnan di Lac Cai. Esaki ta un área di naturalesa importante siendo ku e ta sala di parto di turtuganan menasá i di e karkó. Prensès Máxima a hasi apertura ofisial di e Sentro pa Hubentut i Famia.