Riba su promé dia na Boneiru minister Liesbeth Spies di Relashonnan den Reino a haña un avalancha di pregunta di públiko. El a papia ku nan na Rincon, promé i despues di e karnaval di mucha tradishonal einan. Un tópiko tabata kore manera un liña kòra den e kombersashonnan: falta di plaka pa sostené kosto di bida.

Minister Liesbeth Spies mes delantá a bisa ku e ke papia ku pueblo boneriano. En berdat tur hende por a sera konosí kuné i kombersá. Na Rincon hoben i grandinan a papia kuné tokante problema den bario, forsa di kompra ku a baha, enseñansa, kuido médiko i falta di fasilidat di rekreashon pa hubentut. Un penshonado a puntr’é pakiko e akuerdonan nobo di penshun a kaba kuné asina.

Forsa di kompra
Preis haltu di kosto di bida tabata e palabranan klave durante e kombersashonnan di minister ku pueblo. El a bisa ku e ta komprondé e preokupashonnan pa plaka di pueblo boneriano: “Mi ta komprondé e problemanan di plaka ku pueblo tin masha bon i ku hende ta sobra masha tiki plaka pa motibu di e kompranan ku ta karu. Pero esaki ta e kaso den henter Reino, na Hulanda tambe.”

Spies a enfatisá sí ku e no por primintí nada ku e no por realisá. “E hendenan no tin pasenshi i nan ke pa kos bira mihó pa Boneiru. Pero aworaki na promé lugá ta importante pa skucha.”

Derecho di importashon
E ta spera ku e intenshon di gobièrnu hulandes pa tene un investigashon di forsa di kompra na Boneiru ta un promé paso den e bon direkshon, “no solamente pa sondea opinion, sino tambe pa sa sigur kiko ta bai bon i kiko por mehorá”.

Tambe e intenshon pa baha derecho di importashon di sierto produkto i pa anulá impuesto dòbel, por alivia e falta di forsa di kompra na Boneiru un tiki, segun Spies.