Na momentu ku Hulanda ratifiká konvenshon di Unesco Boneiru mester bini ku lista di Herensia inmaterial. Riba inisiativa di Fundashon Históriko Kultural Boneriano (FuHiKuBo) lo bai traha riba formulashon di un lista di herensia inmaterial di Boneiru.

E sentro hulandes Nederlands ‘Centrum voor Volkscultuur en Immaterieel Erfgoed’ a organisá resientemente na Deurne un konferensha tokante herensia inmaterial, chènsnan den futuro, i tokante posiblidatnan pa un maneho nobo.

Ku eksepshon di Saba, tur isla den Reino Hulandes tabata representá na e konferensia internashonal tokante herensia inmaterial. Bòi Antoin di FuHiKuBo tabata presente na nòmber di Boneiru i a sigui e diferente diskursonan i diskushonnan durante e konferensha.

Unesco
Durante e anochi di apertura, banda di sekretario di estado Halbe Zijlstra (OC&W), a hiba palabra tambe Cécile Duvelle, e sekretario internashonal di e konvenshon di herensia inmaterial di Unesco. E ta e funshonario ku ta duna e maneho di Unesco forma internashonal.

Durante e konferensia e diferente oradónan internashonal a bini ku ehèmpelnan kon den nan pais nan a atendé ku herensia inmaterial, entre otro trahamentu di nan lista di herensia inmaterial pa inkluí den e konvenshon en kestion di Unesco. Tabatin oradónan di entre otro Inglatera, Bèlgika i Merka. Nan a splika kon nan a atendé ku nan propio herensia inmaterial.Na Hulanda nan ta spekulá hopi riba kiko nan mester proponé pa bini riba e lista di herensia inmaterial di Unesco. Fiestanan manera San Nikolas i Aña di Lareina parse ta skor haltu. Na Boneiru Maskarada i Dia di San Juan i San Pedro ta e dos selebrashonnan ku por aparesé riba e lista.

Grafiti
Durante e konferensia tabatin tambe un ekskurshon pa e siudat Eindhoven, kaminda a bishitá entre otro un sitio na unda atraves di añanan a pinta hopi grafiti na un krusada di kaminda. E pregunta tabata ku si mester konsiderá por ehèmpel e grafiti aki tambe komo herensia inmaterial. Tin un grupo den e siudat aki ku ta boga pa aseptá e grafiti aki tambe komo herensia inmaterial.

Awor ta bini un periodo ku, riba inisiativa di FuHiKuBo, lo bai traha riba formulashon di e lista di herensia inmaterial di Boneiru. Despues lo bai duna mas informashon tokante esaki.