'Aneksashon' ta esei ta loke ta bai pasa ku Boneiru, asina líder di PDB Jopie Abraham ta bisa despues ku siman pasá e tabata di bishita na Hulanda. Parlamento hulandes a aseptá e leinan pa BES. Pero maske e diferensha di opinion ku Hulanda tokante referèndem tei kétubai, bestürskolezje di Boneiru lo bai ehekutá e leinan di BES tòg. Pa awor no tin niun otro alternativa, pero sí e menasa ku lo surgi un situashon kaminda no por goberná, asina Abraham ta bisa. Djaluna atardi e lo duna un konferensha di prensa tokante bishita di un delegashon di gobièrnu pa Hulanda.

Ku loke tin riba mesa awor no tin kestion di integrashon òf laso dirèkt ku Hulanda, pasó pueblo di Boneiru no a skohe pa integrashon mané Nashonan Uni ta preskribí. I ta pesei en realidat por papia di aneksashon, anschluss, inlijving', asina e líder di PDB ta bisa apashoná.

Medionan di komunikashon i miembronan di parlamento hulandes tambe no a reakshoná masha positivo riba e manera ku bishita di e delegashon bonereano a tuma lugá den seno polítiko na Den Haag. Fuera di Abraham, Marugia Janga, diputado di Asuntunan Estatal, Anthony Nicolaas di konseho insular i nan asesor hurídiko Douwe Boersema tabata forma parti di e delegashon.

Impase gubernamental
E idea tabata prinsipalmente pa informá parlamento hulandes tokante opinion di Boneiru manera a keda formulá den e dokumento spesial titulá 'Boneiru den Reino.' Fuera di un hustifikashon hurídiko di e opinion di bestürskolezje bonereano tokante referèndem, e ta kontené tambe proposishonnan pa kibra ku e impase gubernamental ku tin ku Hulanda. E deliberashon ku parlamento hulandes no a duna un resultado kla, meskos ku e bishita di kortesia ku a hasi mas den lat na sekretario di estado Ank Bijleveld di Relashonnan di Reino.

Boneiru tabata spera prinsipalmente di haña mas komprenshon di miembronan di parlamento, pero ku introdukshon di Wolbes i e otro leinan di BES, e isla ta hañ'é ta guli manda bou. Segun Abraham, Boneiru tabata algun tempu dispuesto kaba pa introdusí Wolbes, basta Hulanda na su turno lo a respetá resultado di e referèndem. 'Pero 'awor a bin resultá tambe ku maske ki tipo di referèndem nos tene, - si e no ta den kuadro di un entidat públiko- Hulanda no ta rekonosé esei. Nan lo bòikòt e.'

Dos referèndem
Abraham ta papia di dos referèndem ku lo mester tene. 'Un 'referèndem di evaluashon' ku Hulanda ta referí na dje, tokante e entidat públiko ora esaki a funshoná durante algun tempu. I un referèndem den kuadro di e derecho di outodeterminashon di Nashonnan Uní. Por sierto Abraham no ta menshoná un fecha pa esei. Despues ku Gobernador a anulá e lei di referèndem, Nashonnan Uní lo mester investigá esei mas aleu awor. 'Pero 'niun hende no por kita esei di pueblo bonereano mas, (...) esei ta un derecho fundamental.

Mientrastantu Boneiru no por bira un pais kaminda no por goberná sí, Abraham ta bisa, i ta pesei 'nos lo tin di bai apliká e Wolbes ei, (...) no tin otro alternativa, Pero e malkontentu ta keda. Pueblo lo bai ripará ta kiko ta e konsekuenshanan di e aneksashon akí, ku na opinion di Abraham ta kai bou di responsabilidat di partido di oposishon UPB di Ramonsito Booi. Pasobra ta durante nan maneho a negoshá henter e pakete ei.

Matrimonio entre homoseksual
Abraham ta pronostiká no solamente un redukshon drástiko di e kantidat di ámtenar, pero ta mustra tambe riba e enmiendanan tokante matrimonio entre homoseksual, eutanasia i aborto ku parlamento hulandes a aprobá. 'Na Den Haag nan ta pretendé di sa mihó kiko mester sosodé, sin duna e bonereano niun klase di influensha.' P'esei tambe e líder polítiko di PDB ta fèrwaktu ku al final pueblo di Boneiru lo vota kontra e forma ku a duna kontenido na e 'lasonan dirèkt' akí.

Dia 26 di mart Abraham mes lo bira diputado di Struktura Estatal den bestürskolezje i e ta spera di por traha lihé un sita ku RSC-komisario Henk Kamp pa laga e deliberashon ku Hulanda kana kompletamente bon atrobe. Si esei logra sekretario di estado Ank Bijleveld ta bishitá Boneiru na mitar di aprel pa un deliberashon gubernamental.

Skucha Rene Roodheuvel den un entrevista na hulandes ku Jopie Abraham