Konseho di Minister di Reino ta haña ku Kòrsou mester investigá e integridat di promé minister Gerrit Schotte i miembronan di su kabinete Abdul Nasser el Hakim (Desaroyo Ekonómiko) i George ‘Jorge’ Jamaloodin (Finansas) a fondo. Esaki manera Paul Rosemöller ta sugerí despues di a investigá un ke otro.

Sinó Reino – pues Hulanda – mester kai aden pa trese kredibilidat i konfiansa. Esaki a base di e funshon ku Reino tin pa salbaguardiá bon gobernashon (‘waarborgfunctie’) den tur skina di e reinado.

Periodistanan Laureen Schenk i Chaco Castro ta interkambiá di idea riba e pregunta ku si despues di un aña di outonomia ya mester hala sierto strepi òf mester duna ‘e beibi den bruki’ mas tempu.

Balls
Otro tema di diskushon ta ku si Parlamento di Kòrsou tin sufisiente balls pa e mes purifiká e kabinete aktual. E título ‘Curaçao: Doe het zelf!’ di e rapòrt di komishon Rosemöller ta pidi pa esei.

Líder di partido di koalishon Pueblo Soberano Helmin Wiels, ku por sierto ta rechasá e rapòrt di Rosemöller, tambe ke pa su partner di koalishon MFK kita mancha for di gobernashon. Wiels ta mustra riba e echo ku ora e tabatin duda den su minister nan, el a reemplasá nan mesora.

Otro edishon stimulante pues di Sírkulonan Bon Informá.