Nochi Willem di fundashon Bon Gobernashon ke manda un señal kla pa tantu gobièrnu ulandes i e próksimo gobièrnu di Boneiru; nos no ta tolerá faltamentu ku leinan di bon gobernashon. E fundashon a tuma dos medida despues ku wes a disidí di no pèrsigui Ramonsito Booi i Burney El Hage mas den un kaso di korupshon kontra nan. E fundashon ta bai korte di apelashon i el a manda un karta pa minister Donner pidiendo e intervení den esaki.

Booi i Elhage a keda apsolbé di persiguishon den un kaso basta grandi kontra nan. Ta trata di ocho diferente kaso ku entre otro akusashonnan di a tuma plaka bou di mesa i di obligá hefenan di servisio di ehekutá desishonnan ku ta kontra lei.

Nochi Willem no ta komprondé e desishon di ministerio publiko pa sepone e kaso komo ku e tempu ku tabatin disponibel pa investigashon a pasa. 'Tabata un kaso asina grandi, ku mester a tende hopi testigu. Ta imposibel pa logra investigá esaki den dieskuater luna.' Mas si tene kuenta ku den kuminsamentu no tabatin sufisiente fondo i personal pa hiba e investigashonnan segun Willem.

Karta pa Donner
Komo partido perhudiká fundashon Bon Gobernashon lo bai korte di apelashon pa pidi Ministerio Públiko bolbe habri e kaso. Banda di esaki a manda un karta pa minister Donner di Relashonnan di Reino. "Ulanda ta e gobernashon mas haltu awor den nos pais. Ora tin falta di kumplimentu ku leinan di pais, ta nan responsabilidat pa intervení", Willem a deklará.

E no tin masha speransa si. "Nos sa ku Hulanda ta hopi kouteloso ku intervenshon. Nos ta mira esei na Sint Maarten.." E fundashon no a haña kontesta di minister Donner ainda. Nan a aserka Tweede Kamer tambe pa parlamentu di nan banda yuda preshoná e minister pa hasi algu.

Elekshon
Dia 2 di mart tin elekshon pa konseho insular na Bonaire i sigun Willem kos ta hopi friu. "Nunka mi no a mira un elekshon asina'ki na Boneiru. Tin kampaña si pero pueblo ta fadá. Tin un esfera di divishon i frustrashon." E fundashon lo respetá desishon di pueblo den elekshon. Nan ta kere si ku nan a manda un señal hopi kla pa kalke gobièrnu ku sinta na Boneiru ku nan lo bai en kontra ora nan mira faltamentu ku lei den nan pais.

----------------------------------

Download brief hier (pdf, 7mb)