E kos a kuminsá ku un bolo alegre den forma di un ber panda pa un fiesta di mucha. Awor el a krese bira e promé tienda di bolo latino na Hulanda. Ta hasi 33 aña kaba ku Ina Maduro di Aruba a muda bai biba Hulanda. El a sinti falta di kas pero trahamentu di bolo a yud'é resigná.
 

For di e tempu ei el a konvertí su afishon den su trabou i den 'Planet Cake', su tienda na Rotterdam, por haña tur kos ku tin di aber ku bolo arubano òf merikanu. Di produkto pa traha bo mes bolo te un kurso di dòrna bolo. Naturalmente por hasi pedido pa bolo kolorido p'un dia spesial tambe, manera un kasamentu òf un hasiment'i aña.
 

Maduro no ta usa ingrediente típikamente ulandes ni e no ta traha bolo di krema tampoko. "Esei sí tabata duru, Hulandesnan no por imaginá plèstik riba bolo. Pero nan a aseptá, awor e ta na moda."

Panda tei pa keda
 

Despues di 22 aña ainda e oso panda ta den su surtido. "E t'un bolo eksitoso kétubai." Planet Cake ta bende e material tambe, moda ku e kliente por traha bolo na kas. "Nos ke duna hende e oportunidat di usa nan propio diseño, di traha nan mes bolo."
 

Maduro ta saka e resetanan entre otro for di buki merikanu, pero e sa traha nan tambe a petishon i despues di konsultá ku e klientela: Nos ta multikultural i si pidi sierto kos, nos ta wak kiko nos por hasi." 

www.planetcake.nl