Boletin di notisia di 12ór di mèrdia

Demostrashon masal na Amérika Sentral kontra agreshon doméstiko
Riba dia internashonal di hende muhe, miles di hende muhe a demostrá na Amérika Sentral, kontra violensia doméstiko i sifra haltu di asesinato bou di hende muhe. Na Guatemala, Honduras, El Salvador i Nicaragua tambe ta'tin manifestashon. E demostrantenan ta eksigí mas seguridat, derechonan igual i rèspèt pa hende muhe. Aña pasá mas ku 16.000 persona di sekso femenino a keda asesiná na Amérika Sentral. 700 na Guatemala, 400 na Honduras i 300 na El Salvador. Segun organisashon di derecho di hende muhe, na Amérika Sentral hopi biaha no ta tuma denunsianan di agreshon doméstiko na serio pasombra polis no ke mete den pleitu matrimonial.

Siudat Concepción na Chile a skùif tres meter a konsekuensia di temblor
E temblor ku a sakudí Chile un siman i mei pasa, tin konsekuensianan geográfiko. Esaki a sali na kla for di midimentu di aparato GPS. E siudat Concepción, ku ta serka di e episentro, a skùif 3 meter den direkshon wèst. Tambe e kapital di Chile, Santiago, a kambia di luga riba mapa di mundu. Santiago a move mas o menos 28 cm direkshon wèst. E temblor ta di kuater mas fuerte ku a yega di midi. A sinti e temblor te na kosta oriente di Sur Amerika. Asta e kapital di Argentina, Buenos Aires, a move un par di sèntimeter.

Kuba ta kulpa disidente Guillermo Fariñas di chantage
Kuba ta kulpa e periodista disidente Guillermo Fariñas di chantahe. Fariñas dos siman pasá, a drenta wèlga di hamber pa protestá kontra morto di Orlando Zapata. E disidente aki, esta Zapata, a fayesé luna pasá pa motibu di su wèlga di hamber. E tabata protestá kontra e maltrato den prizòn kaminda e tabata será. Fariñas ke logra ku su wèlga di hamber ku ta laga 26 otro disidente sali liber. E 26 personannan aki mester haña kuido médiko. Outoridatnan Kubano ta haña e akshon di Fariñas inakseptabel. Ounke e estado di salu di Fariñas ta baiendo atras, outoridatnan Kubano ta tene man duru.

Gobièrnu Merikano ta pèrmití eksportáshon pa Iran, Kuba i Sudan
Gobièrnu Merikano por lo pronto ta pèrmití eksportashon di algun software di ènternèt pa Iran, Kuba i Sudan. Ta trata di software pa saitnan sosial di ènternèt , pa blòg, chèt, i pa kompartí potrèt i film. Te ku awor no tabata pèrmití esaki pasombra Iran, Kuba i Sudan ta pará riba lista pretu di Estados Unidos. Hilary Clinton, minister di asuntunan eksterior, a bisa ku a disidi di tuma e medida aki, pa asina habitantenan di e paisnan por komuniká ku eksterior, sin influensia di regimen di nan pais. "Esaki ta importante enkonekshon ku ekspreshon liber", Clinton ta bisa. El a mustra riba desaroyonan manera a tuma luga aña pasá na Iran, kaminda Twitter, Facebook i YouTube a hunga un ròl importante den protestá kontra gobièrnu Iranes.

CDA ta keda sostené prome minister Balkenende
Direktiva di partido polítiko CDA no ta mira motibu pa konsiderá posishon di lider polítiko, Jan Peter Balkenende, komo kabes di lista. Presidente di partido Van Heeswijk, a bisa despues di reunion di direktiva di partido, ku Balkenende ta keda na kabes di lista pa loke ta trata e elekshon di 9 di juni próksimo. Delaster dianan, aki aya, den seno di CDA tabata reina pregunta, si Balkenende despues di 4 gabinete ku a kai, ta e persona adekuá pa ta na kabes di lista di CDA. For di resultado di elekshon munisipal a sali afo ku e partido a pèrdè mas ku 200 asiento. Prinsipalmente na siudatnan grandi di Hulanda. Balkenende a atmití ku kaida di gobièrnu i imagen di politikonan ta'tin un efekto grandi riba elekshon munisipal.

Findishi kolekshon Peter Stuyvesant ku hopi ganashi
Na Sotheby's na Amsterdam e findishi di e prome parti di e kolekshon di Peter Stuyvesant a trese 13,9 mion euro den kashi. Esaki ta 3 bes mas ku a ferwagt. A paga e preis di mas haltu, 900 mil euro, pa un kuadro di un webu di Dinosaurio di e aleman Martin Kippenberger. Tambe artenan di Karel Appel i Jan Schoonhoven a keda bendí pa un preis mas haltu ku esun original. E kolekshon di arte moderno ta di Alexander Orlow. El a kologá e pinturanan den su fabriká di tabako pa asina siña su trahadonan kiko ta arte. Despues di su morto e doño nobo, British American Tobacco, a disidí di bende e kolekshon.

Rapper Lil Wayne ta bai será un aña
Rapper Lil Wayne a haña sentensia di un aña pa poseshon di arma di kandela. Durante un gira na 2007 Wayne ta'tin un arma di kandela kargá den su bùs. E rapper ta un di e artistanan mas miho pagá na Merka. Na 2008 su album The Carter III tabata esun mas miho bendí. Tambe el a gana un grammy award. E rapper ta'tin ku tende sentensia luna pasá pero hues a duné suspenshon pasombra e ta'tin ku hasi un operashon drástiko na su dentadura. El a laga adorna esaki ku djamanta ku un balor total di 150 mil dolar.

Neelie Kroes asombrá ku Aletta Jacobsprijs
Komisario oropeo, Neelie Kroes, a gana Aletta Jacobsprijs. Kada aña pasa ta otorgá e premio riba dia internashonal di hende muhe. Rijksuniversiteit Groningen ta otorgá e premio na hende muhenan ehemplar i ku un ròl importante pa loke ta trata emansipashon di hende muhe. Kroes tabata asombrá ku el a gana e premio. Den su diskurso el a bisa ku enseñansa, fleksibilidat i konfiansa den bo mes ta indispensabel den e posishon di hende muhe. Mas aleu el a bisa ku mas hende muhe tin ku haña posishon haltu den empresanan pasombra esaki ta sòru pa diversidat. Pero e no ta mira nada den e idea pa obligá empresanan pa duna hende muhe un posishon haltu.

Wer na Hulanda:
Solo ta bria. Temperatura 5 grado. Mañan ta keda meskos pero temperatura ta subi un tiki.