Boletin di notisia di 12 or di mèrdia

Alarma di bòm na stashòn di Den Bosch
Awe a evakuá stashòn di trèin na Den Bosch despues di un alarma di bòm. Tambe a desokupá kas i kantornan den bisindario di stashòn. Segun polis te awor no a haña eksplosivo. Sí ta sigui buska ku kachó speshal. E konsternashon a kuminsá ora ku pasaheronan den e trein di Roosendaal pa Zwolle a hasi menshon di un hòmber sospechoso. E tabatin un paña largu blanku bistí i riba dje un yas bèrdè. E hòmber a grita ku lo e laga un bòm eksplotá. Tambe el a insinuá den direkshon di e atentadonan di 11 di sèptèmber 2001 na New York. E pasaheronan a atvertí empleadonan di trein ku a arestá e hòmber i a entreg'é na polis. Despues a evakuá e stashòn i tambe kantor, tienda i kasnan alrededor dje edifisio di stashòn. Por lo pronto no tin tráfiko di trein den direkshon di Den Bosch. Sentenáres di pasahero ta pegá na stashòn di Den Bosch.

Reakshon gabinete hulandes riba rapòrt di Irak ta kla
Partidonan di koalishon CDA, PvdA i ChristenUnie a yega na un akuerdo tokante un reakshon komun riba e rapòrt di Irak di komishon Davids. Awe lo manda un karta ku e reakshon pa Tweede Kamer. Luna pasá e rapòrt krítiko di Davids a hera kousa un krísis di gabinete. PvdA a haña ku promé minister Jan Peter Balkenende a tuma muchu distansha dje rapòrt di e komishon. Un posibel mishon hulandes nobo pa Afganistan tambe ta hunga un ròl den e diskushon relashoná ku e rapòrt di Irak. OTAN, esta e organisashon di tratado militar nort atlántiko, a pidi Hulanda ofishalmente pa prolongá e mishon na Afganistan. Fuentenan na Den Haag ta mèldu esaki. Kontenido eksakto dje petishon i si ta trata di Uruzgan òf di otro provinsia, ainda ta konfidenshal.

PvdA: Niun kompromiso ainda riba mishon nobo Uruzgan
Ainda no tin un akuerdo na bista tokante un futuro mishon hulandes na Afganistan. PvdA ta bisa e kos akí relashoná ku informenan den prensa, ku un kompromiso ta na kaminda. Ultimo dianan tabata parse ku partidonan di koalishon lo por bai di akuerdo pa manda entrenadónan pa ehérsito afgano. Ayera a sali na kla tambe ku Otan a entregá un petishon ofishal na gabinete. Pero ademas e aliansa lo a pidi pa manda sentenáres di militar di kombate. Kontinuashon di un mishon di kombate den ki forma ku ta, ta inaseptabel pa PvdA.

Grupo prominentenan ke pa regla ayudo pa pone fin na bida
Un grupo di Hulandes prominente ke logra, pa medio di inisativa sivil, pa tur Hulandes riba 70 aña haña ayudo profeshonal, si nan ke pone un fin na nan bida. E grupo ta yama su mes 'Uit Vrije Wil', esta 'For di Boluntat Liber'. E grupo ta konsistí di entro otro èks politikonan Frits Bolkestein i Hedy d'Ancona, kabaratero Paul van Vliet i sientífiko riba terenu di serebro, Dick Swaab. Tin mester di 40.000 firma pa pone e tópiko riba agènda di Tweede Kamer. E grupo ke pa suisidio no ta kastigabel mas si diferente eksperto bai di akuerdo den dos seri di kòmbersashon riba e asuntu.

Hefe di kuerpo polisial Rotterdam a tuma retiro
Hefe di kuerpo di polis di Rotterdam, Aad Meijboom, a tuma retiro. E hefe di polis a asumí su responsabilidat relashoná ku e disturbionan ku a tuma lugá aña pasá ougùstùs na Playa na Hoek van Holland. Un hóben a pèrdè su bida ora bala di polis a alkans'é. Basta siman kaba ta kuestioná Meijboom despues di un rapòrt yen di krítika tokante e disturbionan. E ta keda den funshon te ora ta konosí ken ta su susesor. Meijboom ta bisa ku e no ta e persona adekuá pa guia e proseso dje kambionan den e kuerpo. El a kòmbersá tokante e kambionan ku alkalde di Rotterdam, Ahmed Aboutaleb i ku e demas alkaldenan di munisipionan den bisindario.

Ronald P. sospechá di segundo asesinato
Hustisia a bolbe detené e hòmber sentensiá pa e asesinato sonado na Putten. E biaha akí a detenéle relashoná ku morto di Anneke van der Stap di Rijswijk na 2005. Oktober di 2009 a dikta sentensia pa Ronald P. di 34 aña. El a haña un kastigu di 15 aña di prizòn pa asesinato di Christel Ambriosius. Siman pasá notisia a sali ku reshèrshi i ministerio públiko a laga koba saka kurpa di Van der Stap, pa hasi investigashon forense adishonal. Ministerio Públiko no ta bisa ku a detené Ronald P. pa motibu di resultadonan dje investigashon ei.

Venesuela ta kasi sin koriente pa motibu di sekura
Presidente Chávez di Venesuela a proklamá loke e ta yama un estado di emergensia pa elektrisidat. E pais ta sufri dje periodo di sekura di mas largu den 100 aña. E sentral di forsa di awa pegá ku Guri, un dam den riu di Orinoco ta lucha ku un nivel di awa sumamente abou. Normalmente e sentral ta suministrá elektrisidat na 70% di poblashon venesolano. E estado di emergensha ta enserá ku lo aselerá medidanan pa oumentá produkshon di elektrisidat. Lo mester invertí miones den sentralnan nobo. Luna pasá Chávez a disidí pa stòp suministro di elektrisidat diariamente pa algun ora. Pero Venesolanonan a bira furioso i el a anulá e medida. E presidente a anunsiá e estado di emergensia di elektrisidat den su sho nobo na radio yamá De Repente Con Chávez. E programa yama asina pasobra ki ora ku e ke e por eksigí ora di transmishon.

Prius 2010 tambe tin difikultat
Fabrikante di outo Toyota a pidi klientenan rònt mundu pa debolbé su modelo nobo Prius pa motibu di problema na e sistema di wanta brek. Segun Toyota no tin nada robes na e outonan bendí for di yanüari. Mester adaptá esnan ku a bende promé ku yanüari sí. Ta trata di Prius 2010. For di mei aña pasá a bende mundialmente 300.000 ehemplar dje modelo akí. Na Estados Unídos shen outomobilista a mèldu ku nan kier sa ku nan brek di Prius 2010 no ta traha bon. Toyota ke gana konfiansa atrobe ku e akshon pa yama e outonan bèk. Siman pasá kaba e kompania mester a yama bèk 8 mion di outo di otro modelo, pa motibu di problemanan ku tròt.

Pronóstiko di tempu na Hulanda
Awe ta un dia nublá, wer por habri djis un tiki aki aya. Temperatura máksimo di mèrdia ta 2 grado. For di mayan sneu por kuminsá kai atrobe.