Boletin di notisia 13.00 or

PvdA ke aklarashon tokante klínika di adikshon na Kòrsou
PvdA ke aklarashon di gabinete tokante e klínika luhoso Jellinek Reatreat na Kòrsou. E partido ke garantia ku lo no usa plaka di prima di seguro pa e klínika. Banda di esei e ke aklarashon tokante kiko ta paga ku plaka privá i kiko tapaga ku plaka di gobièrnu. E klínika privá ta haña seis shen mil euro di supsidio di ministerio di Asuntunan ekonómiko komo empuhe pa Antia. Ta spera un fluho turístiko nobo di hende ku ke kura na Kòrsou di nan adikshon. E tratamentu ta kosta seis shen euro pa dia. Otro institutonan partikular di kuido di salubridat mental ta keha dje konkurensha falsu. Pasobra Jellinek Retreat por wanta nan preisnan abou pa motibu dje supsidio. Jellinek mes ta haña finansiamentu di gobièrnu aki na Hulanda.

Disidentenan kubano ke referèndem
Disidentenan kubano a hasi un yamada na nan gobièrnu pa tene un referèndem tokante liberashon dje prizoneronan polítiko. Nan petishon ta pará den un karta na presidente Raúl Castro. Segun e disidentenan lo por tene e referèndem pareu ku e elekshon munisipal dia 25 di aprel. E disidente di 48 aña Guillermo Fariñas ta bisa, ku lo e stòp ku su wèlga di hamber si e referèndem bini. Pa 44 dia kaba e periodista no a kome, i ta den un hòspital na infius. Ku e akshon e kier fòrsá liberashon di 26 prizonero polítiko na Kuba. Mester bisa si ku e chèns ku lo tene un referèndem ta nihil. Castro a bisa na varios okashon, ku lo e no sukumbí pa chantahe. El a bisa tambe ku si Fariñas fayesé, esei ta responsabilidat dje disidente mes. Anteriormente e aña akí a fayesé e disidente Orlando Zapata Tamayo, despues di un wèlga di hamber di 85 dia.

Parlamentu Trinidad & Tobago disolvé
Presidente Maxwell Richards di Trinidad & Tobago a disolvé e parlamentu. Esaki ta nifiká ku denter di tres luna lo tene elekshon nobo na e islanan. E desishon dje presidente a kai un dia promé ku un debate den parlamentu, tokante e ròl di promé minister Patrick Manning. Oposishon ta kulpa e promé minister di korupshon. Tambe Manning lo a usa benefisionan di gas natural pa proyektonan ku mayoria dje pueblo di Trinidad & Tobago no tin kasi nada na dje. Por ehèmpel pa un kas di kampo luhoso dje promé minister. Segun politikólogonan na Trinidad & Tobago, presidente Richards a disolvé e parlamentu bou di preshon di Manning ku ke reforsá su gara riba oposishon, pa medio dje elekshon nobo.

Mayoria Haitiano tin un dak riba nan kabes
Mas o ménos 90 porshentu dje 1.3 mion Hatianonan, ku a pèrdè nan kas durante dje temblor tin entre tantu un dak riba na kabes. Ounke esaki ta temporal paso mayoria di nan ta biba den tènt. Esaki a sali na kla for di sifranan di Nashonnan Uní. Nashonnan Uní ta spera ku pa promé di mei tur Haitiano tin di un manera òf otro un lugá pa biba. Esaki ta importante pasobra temporada di awaseru lo yega na mei, su punto kulminante. Delaster añanan ta asina ku sentenáres di habitante di Haiti a muri durante temporada di awaseru pa motibu di inundashon i avalancha di tera. Segun outoridatnan hatiano mas ku dos shen 20 mil hende a pèrdè nan bida durante e temblor di dia 12 di yanüari. For di investigashon di Wereldomroep a sali na kla ku e kantidat di morto ta probablemente ménos.

Tiger Woods ta bèk
Tiger Woods a hasi su comback ofishal riba kampo di gòlf. Despues di un ousensia di algun luna, e merikano di 34 aña, tabata un dje partisipantenan dje torneo Masters na Augusta, ku a kuminsá ayera. E torneo na Estados Unidos ta e promé evenementu grandi riba agènda internashonal di gòlf. Woods a retirá temporalmente na desèmber pa tempu indefiní pa motibu dje divulgashonnan un tras di otro di su relashonnan amoroso, pafó di su matrimonio. E indiskutibel number unu di mundu, a bisa, ku e kier hasi tur loke e por pa salba su matrimonio i kura di su adikshon pa sèks.

Periodo di rou nashonal na Kirgizia
E gobièrnu interino di Kirgizia a proklamá un periodo di rou nashonal, despues dje disturbionan di delaster dianan. Djarason sigur 75 hende a pèrdè nan bida. I mas ku mil hende a sufri herida. Tambe djaweps anochi i marduga tabata intrankil na Bisjkek, kapital di Kirgizia. Ehérsito a tira dirihí riba sakeadónan ku na nan turno a sende outonan i edifisionan na kandela. Awe i mayan banderanan ta kologá halfstòk i lo dera e promé víktimanan. Presidente Bakijev a hui despues dje tumamentu di poder pa sur dje pais. E ta ninga pa retirá i ta bisa ku e intrankilidat na Kirgizia ta trabou di podernan estranhero, pero e no ta menshoná un pais konkretu.

Futbòl oropeo
HSV di Alemania i Liverpool a alkansá semi final den Champions League. HSV no mester a hasi mashá esfuerso pa gana Standard Luik. E Alemannan a gana na kas kaba ku skor di dos pa un, i na Bèlgika nan a gana 3 pa 1. Liverpool a bati Benfika ku skor di 4 pa 1. Dirk Kuyt a skor e promé gol pa e Inglesnan. HSV lo hunga kontra Fulman di Inglatera den semi final. E otro wega di semi final di Champions League ta entre Liverpool i Atletico Madrid. Atletico Madrid a pasa pa semi final, a base dje kantidat di gol den e torneo. E wega di kuart final kontra Valencia a terminá sin niun gol.

Pronóstiko di tempu na Hulanda
Solo ta bria regularmente aki na Hulanda. Mas lat awe ta mas nublá, pero ta keda seku. Temperatura máksimo ta 15 grado.