Boletin di notisia di 12or di mèrdia

Obispu Van Luyn ke investigashon independiente di abusu seksual
Obispu van Luyn di Rotterdam ke pa bini un investigashon independiente di abusu seksual na institutonan katóliko. Monseñor Van Luyn, presidente di e konferensha hulandes di obispu, a bisa esaki den e programa di televishon Kruispunt. Mayan e obispunan ta reuní pa papia di e asuntu. Siman k'a kaba a drenta 200 notifikashon di abusu seksual na e sentro yamá Hulp en Recht, o sea Ayudo i Hustisia, kaminda por mèldu tipo di kasonan asina'kí. E asuntu relashoná ku abusu seksual na institushonnan katóliko a start despues ku emisora Wereldomroep i e matutino NRC Handelsblad a divulgá ku padernan salesiano a abuzá di mucha hòmbernan na un internat na 's Heerenberg, na añanan sesenta i setenta.

Alberto Stegeman ta riba dje atrobe
Atrobe e periodista 'undercover' Alberto Stegeman a logra trafiká eksplosivo falsu na bordo di un avion na Schiphol. E biaha aki el a trese un liter di líkido na bordo di un avion di pasahero, asina por a mira na kanal di televishon SBS 6. El a kumpra bibida taxfree, el a kambia e bibida pa un otro líkido i despues laga sey'é den un saku di plèstik n'e tienda mes. Despues e por a abordá ku e bòter. Ademas e por a bula kune di London pa Washington, sin ku a listr'é. Fin di aña 2008 Stegeman a
lográ drenta e hangar na Schiphol, kaminda ta stashoná e avion di gobièrnu ku sa usa pa transportá Lareina. Promé ku esei e tabata drenta tur sorto di lugá ku ta será pa públiko na Schiphol, antó tres luna largu. El a yega di pone un bòm falsu den sekshon di karga djun avion di pasahero.

Kandela grandi na Veendam
Na Veendam a kai un morto den un kandela grandi. E víktima ta un bombero ku a pega bou di un muraya ku a basha'den. Un empresa ku ta bende artefakto eléktriko i un snèk a kima por kompleto. Algun deséna di hende ku tabata biba riba i banda di e empresanan mester a sali for di nan kas. A hiba nan hotèl. Ainda no ta konosí kiko a okashoná e kandela. Daño material probablemente ta kore den miones di euro. Promé k'esei a surgi kandela den un diskoteka, tambe na Veendam. Ei a pag'e kandela rápidamente.

Temnblor na ost di Turkia
E parti ost di Turkia a sufri un temblor di 6.0 riba eskala di Richter. A kai desénas di morto. E episentro tabata 40 kilometer for di siudat Bingöl, na provinsia Elazig. For di diferente pueblo den e área a drenta notisia di kas ku a basha'den. Testigunan ta konta ku tera a tembla mas o ménos un minüt, i ku a surgi pániko bou di pueblo. Regularmente tin temblor na Turkia. Na aña 1999 a kai 18.000 morto den un temblor ku un forsa di 7 riba eskala di Richter.

Konteo di voto na Irak
Na Irak nan ta kontando voto di elekshon di parlamento djayera. Opservadornan ta papia di un bon asistensha, maske tabatin algun atentado sangriente ku a eksigí bida di por lo ménos 38 hende rònt Irak. Presidente Obama di Merka a elogiá e miones di Irakes ku tabatin kurashi di bai vota, apesar dje peliger iminente. Tabata e di dos elekshon na Irak for di tempu dje invashon merikano na aña 2003. E biaha aki e minoria sunita tambe a partisipá.

Situashon di bibienda na Haiti
Mitar di e 1.3 mion di hende ku a pèrdè kas despues di e temblor na Haiti tin un dak riba nan kabes atrobe, sea provishonal of nò. Esaki ta nifiká ku 650 mion di Haitiano ainda ta sin bibienda despues di e temblor di 12 di yanüari último, asina Krus Kòrá ta informá. E intenshon ta pa tur hende tin un dak riba nan kabes promé ku luna di mei, komo ku p'e tempu ei temporada di áwaseru ta mas pisá. Outoridatnan haitiano ta kleim ku 220.000 hende a pèrdè nan bida den e temblor, pero segun un investigashon di Wereldomroep ta ménos.

Tres dia i luto nashonal na Chile
Na Chile a proklamá tres dia di luto nashonal pa víktimanan dje temblor i e tsunami di un siman pasá. Tur bandera na e pais ta halfstòk, i na hopi lugá ta tene seremonia konmemorativo. E kantidat di morto ofishal ta 452. Un kantidat deskonosí di hende ta pèrdí ainda. Band'i dos mion di Chileno a pèrdè nan kas.

Violensha entre Kristian i Musulman na Nigeria
Na Jos, un siudat na Nigeria a kai hopi morto atrobe den e violensia entre Kristian i Musulman. E violensia mas resien a kosta bida di sigur 500 hende, asina outoridatnan ta bisa. Ganaderonan islámiko a ataká habitantenan di e pueblo Dogo Nahawa, zùit di Jos. A kap e habitantenan mata ku machete. Testigunan ta bisa ku tin hopi hende muhé i mucha entre víktimanan.

Seis Oscar pa The Hurt Locker
E pelíkula dramátiko di guera, 'The Hurt Locker' a bira e gran ganadó di Oscar na Hollywood. E pelíkula tokante un grupo di eksperto di bòm na Irak a gana 6 Oscar, un di nan komo e mió pelíkula. Ademas, direktor Kathryn Bigelow a gana premio pa mihó direkshon. Ta promé be den 82 aña di Academy Awards ku un hende muhé ta gana e Oscar tan deseá aki. Ku e seis Oscarnan Bigelow ta superá su kasá James Cameron; su espektákulo tridimenshonal Avatar a gana tres Oscar so. E premio pa mihó aktor a bai pa Jeff Bridges pa su ròl komo kantante fuma di country music den e pelíkula Crazy Heart. Sandra Bullock a sali komo mihó aktris; den e tragikomedia 'The Blind Side'e ta aktua komo un ama di kas bon pará, ku ta yuda hende sin kas traha i desaroya karera den deporte. E Oscar pa e mihó pelíkula den un idioma ku no ta ingles a bai pa 'El Secreto de Sus Ojos' di e direktor argentino Juan José Campanella.

Pronóstiko di tempu
Despues ku a fris un tiki den oranan di mardugá, a kai poko sneu meinta. Awe mèrdia lo bira seku i temperatura ta 5 grado riba sero.