Costa Rica ta haña promé presidente femenino
Costa Rica a haña un presidente femenino pa promé biá den istoria. Segun resultado provisorio e kandidato sosial-demókrata, Laura Chinchilla, a gana. Su kontrinkantenan, e derechista Otto Guevara i e sentro-iskierdista Ottón Solis a aseptá nan derota. Chinchilla, ku den pasado tabata vise presidente di Costa Rica, por konta ku 47% di voto. Si logra mas ku 40% di voto, no mester di tene un di dos tanda di votashon na aprel. Laura Chinchilla ta sigui presidente saliente Oscar Arias.

Viktor Janukovitsj a pidi promé minister Timosjenko pa baha
Viktor Janukovitsj a proklamá su mes ganadó di elekshon presidensial na Ukraína. Janukovitsj ta pro Rusia i miembro di oposishon. Despues di a konta 95% di e votonan, el a haña 2% mas ku promé minister Julia Timosjenko den e segundo buèlta elektoral. Timosjenko ta pro mundu oksidental. Janukovitsj a pidi Julia Timosjenko baha pero ainda e promé minister ta ninga di renunsiá su puesto. Kampo politiko di Timosjenko ta bisa, ku sigun nan konteo ta nán kandidato a gana. Ayera mas ku 36 mion di votadó por a bai urna na Ukraína. E ganadó ta sigui presidente Viktor Jusjenko, ku a bini na mando despues di e asina yamá revolushon oraño na 2004.

Kantidat di estranhero a subi na Spaña
E kantidat di estranhero na Spaña a subi den e dies añanan ku ta tras di lomba. Instituto nashonal di estadístika spañó a partisipá esaki. Na 2009, komo 5.6 mion di estranhero tabata biba na Spaña. Dies aña pasá e kantidat tabata ménos ku un mion. Mas o ménos 2.5 mion di migrante ta bini di Union Oropeo, kasi dos mion for di Merka i Latino Amérika. Anto 200.000 ta prosedente di paisnan ku no ta miembro di Union Oropeo. Mayoria estranhero ta bini for di Maroko, Rumania i Ecuador.

Parlamento hulandes kisas ta di akuerdo pa keda Afganistan
Parlamento hulandes por bai di akuerdo si militarnan hulandes keda Afganistan pa entrená soldánan di e pais. Djasabra e general britániko di OTAN a bisa ku Hulanda lo por duna su aporte. Pronto gabinete hulandes tin ku tuma un desishon si nan ta keda mas largu na Afganistan. Lider di frakshon di Partij van de Arbeid, Mariette Hamer, a bisa durante un debate na Radio 1, ku e proposishon di e Ingles ta interesante. Su kolega di CDA, Pieter van Geel a bisa ku e idea pa trein sòldanan di Afganistan por forma parti di e futuro hulandes na e pais. PvdA ta para riba ku no por bini mas mishon di guera, pero CDA ta haña ku ainda esaki ta un posibilidat.

Expreszo ta protestá pa dosente i alumno homoseksual
E revista pa homoseksual Expreszo ke pa hóbennan homo partisipá na un akshon awe i mèldu malu. Di e manera aki nan por protestá awe mèrdia na Den Haag kontra skolnan, ku ta ninga dosente i alumno homoseksual. E hefe di redakshon ta spera ku tiki alumno lo bai Den Haag. E ta kere ku e hóbennan tin miedu ku si nan bai, ta kita nan for di skol. Skolnan di enseñansa speshal tin mag di kita studiante i dosente for di skol. No pa e echo ku nan ta homoseksual, pero pasó nan ta ekspresá nan sintimentu homoseksual. Awe parlamentu tabata kier a papia riba e tema akí, pero komo ku minister Ter Horst ta malu, e reunion no ta sigui.

Sieneke ta bai representá Hulanda na Eurovisie Songfestival
Kantante Sieneke ta bai representá Hulanda na Eurovisie Songfestival. Ayeranochi a skohe e mucha muhé di 17 aña durante e songfestival nashonal di Hulanda. Públiko presente i hurado por a skohe entre sinku finalista. Nan tur a kanta nan vershon di e kantika 'Ik ben verliefd, sha-la-lie". Pierre Karnter a skibi e kansion. Na último ora Sieneke i grupo Loekz a haña mes tantu voto. Un di e miembronan di Loekz ta antiano. Pierre Kartner ta'tin ku skohe entre nan dos. Na promé instansha el a nenga, pero e no tabatin otro opshon. Despues di a pensa hopi, el a skohe Sieneke. Fin di mei ta tene Eurovisie Songfestival na Norwega.

Hulanda satisfecho ku puesto den kompetishon preliminar di Kampionato Oropeo
Entrenadó nashonal Bert van Marwijk ta satisfecho ku e posishon ku Hulanda a haña den kompetishon preliminar di Kampionato Oropeo pa 2012. A skohe Hulanda na Varsovia pa hunga kontra Ungria, Suesia, Finlandia, Moldavia i San Marino. Van Marwijk a bisa ku e promé tres paisnan ta kontrinkantenan serio. Dick Advocaat ta coach di Bélgika pero ta den pul mas difísil. Nan kontrinkante ta entre otro Alemania, Turkia i Oustria. EK ta tuma lugá na 2012 na Ukraina i Polonia.

Wega di bala hulandes
Den divishon di honor FC Twente a sufri desbentaha den su lucha pa e título nashonal. Na Amsterdam nan a pèrdè di Ajax ku skor di 3 - 0. Ajax ta number tres den e divishon. PSV si a skor bon djasabra despues di a gana 2-0 na kas kontra ADO Den Haag. Di e manera akí nan a haña un puesto mas haltu. Feyenoord a pèrdè di kampion nashonal AZ, e wega a finalisá ku 2-0. RKC Waalwijk a pèrdè na kas 1-0 kontra NEC. VVV Venlo a gana Vitesse, 2-0.

New Orleans Saint ta gana Super Bowl
New Orleans Saints a gana e di 44 edishon di Super Bowl. E tim tabata muchu fuerte pa e kontrinkante Indianapolis Colts, ku tabata favorito. Nan a gana 31 pa 17. Na kuminsamentu Colts tabata bon pará, e skor tabata 10-0. Despues tenshon a drenta wega. Skor a kambia bira 17 pa 16 i New Orleans ta'tin último palabra. Ta promé biaha ku New Orleans Saints ta gana Super Bowl.

Pronóstiko di tempu
Shelu ta nublá pero wer lo habri sí. Tur kaminda ta seku. Mas lat den dia solo por bria. Temperatura ta entre dos grado bou di sero i dos grado riba sero. For di djárason ta spera sneu atrobe.