Boletin di notisia, 13:00 or

Inundashon na Rio de Janeiro a kousa 145 morto
E kantidat di morto kousá pa e mal tempu na kapital di Brazil, Rio de Janeiro a subi bai 145. Ainda desenas di hende ta pèrdí. Mayoria di víktima a kai den e siudat Niterói, kaminda un avalancha di tera nobo a distruí 45 kas i a lastra mas o menos 60 hende bai kun'é. E mal tempu a pone sigur 1700 Brasileño pèrdè nan kas i ta kalkulá ku 11 mil hende mester a bandoná nan kas. For di djaluna Rio de Janeiro ta sufri di e awaseru di mas pisá den kasi mitar siglo, loke a kousa avalancha di lodo, avalancha di tera i inundashon. E kamindanan grandi den e siudat di miones ketu bai ta bou di awa. A sera skolnan i a kanselá hopi buelo bayendo pa - òf saliendo for di Rio. Alkalde Eduardo da Costa Paes ta rekomendá habitantenan keda paden.
 

Obama i Medvedev ta firma tratado di arma nobo
E presidente merikano Obama i su kolega ruso Medvedev awe ta firma un tratado di arma nobo na Praag. Luna pasá Merka i Rusia a palabrá ku den e añanan ku ta bini nan ke baha e kantidat di arma nuklear stratégiko drástikamente, te mas o menos 1500. Tambe lo limitá e kantidat di instalashon di lansamentu. E akuerdo nobo mester remplasá e akuerdo START di aña 1991, ku a kaba aña pasá. Lo baha e kantidat di arma nuklear hopi mas tantu ku tabata reglá den e tratado ei.
 

A kore ku presidente Bakhijev di Kirgizia
E gobierno interino di Kirgizia, ku a nombra su mes komo gobièrnu, ta bisa ku nan tin mando kompleto riba ehérsito i trupanan di frontera, despues ku ayera a kore ku presidente Koermanbek Bakhijev for di e kapital Bisjkek. Prome minister suplente Roza Otoenbajeva ta bisa ku e ta desmantelá parlamento i ku su gobièru lo keda mitar aña pa traha un konstitushon nobo i organisá elekshon liber. Segun Otoenbajeva presidente Bakijev a hui bai suit di e pais pa mobilisá su siguidónan. Miles di demonstrante a kore ku e presidente ayera. Nan a protestá kontra preis haltu di gasolin, korupshon i violashon di derecho humano den nan pais. Mas o menos 70 hende a pèrdè nan bida i sigur 500 otro a keda heridá ora ku trupanan di seguridat a basha bala riba e demonstrantenan, asina e ministerio di Salubridat Públiko di Kirgizia a laga sa.
 

A sospechá diplomata di Qatar di terorismo
A arestá un diplomata di Qatar na bordo di un avion merikano pasobra e kera laga un bòm eksplotá. A resultá ku tabata un mal entendementu. Trahadonan di siguridat na bordo a dominá e hòmber riba un buelo di United Airlines di Washington pa Denver, pasobra nan a kere ku e kera sende su sapatunan na kandela. Pero for di investigashon a sali ku e no tabatin eksplosivo. Segun media merikano probablemente e hòmber a huma un sigaria riba tualèt i e tabata pagando e kabitu ku su sapatu ora ku nan a atrapé. Despues den chansa e hòmber a bisa nan ku e kera sende su sapatu na kandela. Mesora a bati alarma grandi. Servisionan di ayudo a ranka sali na gran eskala i avionnan F16 a subi bai bula banda di e avion.
 

Wakker Dier ke para importashon di karni di kabai for di Merka Latino
E organisashon pa bienestar di bestia Wakker Dier ke pa fabrikantenan hulandes di snèk no usa karni di kabai ku ta bini di Merka Latino. For di investigashon undercover na Brazil i Mehiko lo a sali ku hopi karni di kabai ta bini di kabai ku malnutrishon i maltratá di Merka Latino. Na Hulanda ta usa e karni aki pa traha por ehempel frikandel, hamburger i kroket. Segun Wakker Dier anualmente Hulanda ta importá 11 mion kilo di karni di kabai espesialmente for di Merka Sentral i Sur Amerika.
 

Edat mínimo pa kumpra alkohòl na Hulanda ta keda 16 aña
Na Hulanda e edat mínimo pa por kumpra alkohòl ta keda 16 aña. Gabinete, pa medio di un prueba, kera duna munisipionan e posibilidat pa subi e edat pa 18 aña, pero un mayoria den parlamento no ta di akuerdo. E prueba pa subi e edat mínimo mester a duna munisipionan mas posibilidat pa kombatí abusu di alkohol bou di hoben. Pero segun entre otro PvdA i VVD esaki lo no funshona, entre otro pasobra e hobennan lo bai otro munisipio kaminda e edat mínimo a keda 16 aña. Ademas e partidonan ta pensa ku e problema ta mas parti seka hobennan bou di 16 aña di edat. Ta pesei nan ke pa kontrolá e limité di edat mas miho.
 

Futbòl: Arjen Robben ta hinka Bayern Munchen den semi final di Champions League
Bayern Munchen a yega semi final di Champions League. E tim di Louis van Gaal na Inglatera a pèrdè 3-2 di Manchester United. Na Alemania Bayern a gana 2 pa 1. E kampion rèkert aleman despues di shete minüt kaba tabata atras 2 pa nada pa motibu di gol di Nani i Darren Gibson. Na half time asta tabata 3 pa nada, gol di Nani atrobe. Den e di dos parti Bayern Munchen a bini bèk, prome e delantero Ivica Olic a drecha e kos. E skor di 3 - 2 ku a skapa nan a bini di parti di Arjen Robben. Den semi final Bayern ta hunga kontra Olympique Lyon, kendenan a pèrdè un pa nada di Bordeaux. Na kas Lyon a gana kaba 3 pa 1. Den e otro semi final FC Barcelona i Lyon ta hunga kontra otro.
 

Pronóstiko di wer
Tin hopi nubia i awa ta kai. Poko poko lo bira mas seku. Awe tardi solo ta bria den west i den ost tin algun nubia ainda. Lo bira 10 grado na kosta te ku 14 grado mas den interior.