Boletin di notisia, 6 di mart, 12:00 or

Protesta kontra Wilders na London
Na London polis a arestá mas o menos 50 persona ku tabata demostrá kontra lider di PVV, Geert Wilders. A tene e grupo anti fasista separá for di e grupo pro Wilders. Esaki durante e demostrashon na parlamentu britániko. Mas ku 200 persona a partisipá na e protesta akí. Wilders a pasa su pelíkula 'Fitna' pa mas o menos 60 persona den Senado britániko. Aña pasá ya algun polítiko a invit'é. E tempu ei no a pèrmití Wilders drenta Gran Bretania. E no a yega mas leu ku aeropuerto. Despues Wilders a gana un kaso den korte, i asina e por a presentá e pelíkula tòg na London. Gobièrnu britániko no ta kontentu ku su bishita. Pero segun un bosero di gobièrnu, London no por impedí Wilders di drenta e país. 

PVV Almere
PVV na Almere a konvoká demas partido pa kuminsá papia riba formashon di un kolegio nobo. Ku 9 asiento, PVV lo ta e frakshon mas grandi. Manera ta kustumber, e partido mas grandi ta tuma inisiativa den formashon. Pa e motibu akí lider di frakshon, De Roon a invitá otro partidonan pa kombersá. Solamente Leefbaar Almere no ta invitá sin mas. E partido lo sinta na mesa ku PVV únikamente si su lider pidi diskulpa. E lo a kompará e lider di PVV ku e asina yamá 'bruinhemden', esta un grupo páramilitar aleman aktivo durante segundo Guera Mundial. Leefbaar Almere ta desmentí di a deklará e kos akí.

Resultado di elekshon na Rotterdam
Te ku 16 di mart lo no ta sigur kiko resultado di elekshon na Rotterdam ta. Riba e dia aki 'Commissie Onderzoek Geloofsbrieven', esta e komishon ku ta investigando e kredensialnan, lo bin ku e desishon final. E komishon akí ta konsistí di miembronan di e aktual konseho munisipal. Si e komishon yega na e konklushon ku e resultado no ta bon, mester tene elekshon di nobo na Rotterdam. Esaki den kaso ku no keda ningun otro solushon. Leefbaar Rotterdam a ophetá e resultado elektoral. E partido a konstatá diferente iregularidat durante elekshon. Por èhempel: stèmlokalnan a laga votadónan yuda otro na momento di vota. Na Rotterdam e kontienda ta kabes kabes entre Leefbaar Rotterdam i PvdA. Urna sentral a deklará ayera ku PvdA a gana ku un diferensia di algun shen voto so.

A nombra Emile Roemer komo ider di frakshon di SP
Miembro di parlamento, Emile Roemer, ta e lider di frakshon nobo pa partido SP. E votamentu tabata un formalidat; no tabatin niun otro kandidato. Pa elekshonnan na yüni awó, Roemer lo ke bira lider di partido tambe. Esaki lo disidí na e kongreso di partido di otro luna. Frakshon di SP tabata en buska di un dirigente nobo. Esaki pa motibu ku Agnes Kant a baha komo kabesanter. For di 2006 Roemer ta miembro di parlamento. E ta atendé mas tantu ku tráfiko i gerensha di suministro di awa. Roemer ta un oponente ferviente di 'kilometerheffing'. Un medida nobo, kaminda lo kita e impuesto kustumbrá pa outomobilistanan, i lo bai kobra impuesto pa kada kilometer ku kore. Tambe Roemer tabata un di esnan ku a sostené e moshon di deskonfiansa kontra sekretario di estado Huizinga enkuanto e sistema nobo di akseso ku tarheta di chep na transporte públiko, OV-Chipcard.
 
Aegon ta tene kuenta ku demandanan
Kompania di seguro Aegon ta tene kuenta ku demandanan na balor di un mion euro. Esaki den kaso di víktimanan di abusu seksual di parti di religiosonan di iglesia katóliko hulandes. Si e demandanan ta mas haltu, iglesia katóliko mes mester paga sobrá sèn. Esaki tabata e palabrashon entre Aegon i obispado di Utrecht, kende a representá iglesia katóliko hulandes. Esaki a sali na kla for di investigashon di NRC Handelsblad i Wereldomroep. E palabrashonnan tabata pa motibu di un konflíkto entre iglesia i e kompania di seguro. Esaki despues di demanda di un mucha muhé ku pastor a abusá di dje seksualmente. Ku e palabrashonnan, e konflíkto entre iglesia katóliko i e kompania di seguro a yega na su fin. Publikashonnan resien tokante abusunan den iglesia tabatin desénas di demandanan nobo komo konsekuensia. Segun Aegon, ahinda no a paga for di e depósito di un mion di euro.
 
Kondekorashon pa militarnan hulandes 
Mas ku 1900 militar hulandes ku tabata aktivo na Afganistan, a risibí un medaya konmemorativo. Esaki pa motibu di e operashon di pas. Otorgashon di e kondekorashonnan a tuma lugá na Brabanthallen na Den Bosch. Komandante general Peter van Uhm a entregá e kondekorashonnan. El a bisa di ta orguyoso di e resultadonan di e militarnan hulandes na Afganistan. Nan trabounan ta pone ku treskuarta parti dje pueblo na e provinsia Uruzgan por biba relativamente seif, asina van Uhm a bisa. Tambe a mustra apresio pa famianan di e militarnan. Komo gradisimentu pa nan sosten, a duna famianan un rosa di plata. E muchanan a haña un medaya spesial pa nan edat. 

Presidente di Islandia ta kulpa Hulanda ku Gran Bretania
Presidente di Islandia ta kulpa Hulanda i Gran Bretania di práktikanan inhustu den e kuestion di Icesave. Segun presidente Grimsson e dos paísnan akí a huza IMF pa preshoná Islandia. Pa buta preshon riba Islandia pa paga plaka di Icesave, lo a retrasá fiansanan di IMF na Islandia, asina Grimsson a bisa den e programa NOVA. Awe Islandesnan lo duna nan opinion den un referèndem riba e akuerdo ku a sera fin di aña pasá. Sondeonan ta mustra ku tres kwart lo vota kontra. Hopi Islandes ta rabiá pa motibu dje interes haltu ku Hulanda i Gran Bretania ta kobra. Segun presidente Grimsson, e dos paísnan akí ke gana hopi sèn ku e kuestion di Icesave.
 
Marina franses ta detené piratanan
Marina franses a detené 22 pirata di Somalia riba oséano Indio. Na Seychellen nan a purba kapturá un barku franses di rekonosementu. Kiko lo bai pasa ku e piratanan ahinda no ta konosí. Na desèmber marina hulandes mester a laga 13 sospechado liber. Esaki despues ku ningun país no kier a husga nan.
 
Tempu
Awe merdia solo lo bria i temperatura lo ta entre 0 i 3 grado. Bientu lo supla for di direkshon nort ost. Esaki lo oumentá e sensashon di frialdat konsiderablemente.