Boletin 1'or di mèrdia,

Obama ta limitá uzo di arma nuklear
Presidente Obama ta bai bin ku reglanan mas estrikto pa uzo di armanan nuklear merikano. Mas lat den dia e lo anunsiá e maneho nobo, pero durante un entrevista ku New York Times el a bisa adelantá kiko ta su plan. Obama ta bisa den e matutino ku e ke desistí di plannan nobo pa desaroyá arma nuklear. Merka lo no uza arma nuklear kontra paisnan ku no ta disponé di nan i ku ta kumpli ku tratado kontra proliferashon. Tampoko si e paisnan ataká Merka ku armanan kímiko o biológiko. Mas aleu Obama ta bisa di ta hasi un eksepshon pa Iran i Nort Korea. Djaweps awor Barack Obama ta firma un tratado ku Rusia na Praga. Ta trata di un akuerdo pa desarmamentu di arma nuklear.

Sait di reveladó ta mustra asesinato di periodista
E sait di reveladó na Merka yamá: wikileaks.org a mustra kon militarnan merikano na Bagdad a mata dos periodista di agensia di prensa Reuters. Tambe nan a kita bida di 12 Irakes. Por mira vidio di e akontesimentu riba wèpsait di Wikileaks. E militarnan ta wak for di nan helikòpter di guera i ta mira e periodista ku su kámara. Nan a mira e kámara pa un pistol, a pidi pèrmit pa tira i a hasi esaki. Militarnan merikano a bolbe pidi pèrmit pa tira, ora nan a mira hende buta e víktimanan den un bùs. E tiroteo a bolbe kuminsá. E akontesimentu aki a tuma lugá 3 aña pasá. For di e momentu ku a haña sa ku algun di e víktimanan ta periodista di Reuters, a kuminsá ku un investigashon. Militarnan merikano semper a bisa ku ta trata di un lucha entre nan i rebeldenan.

Eksploshon den mina na Merka ta kosta bida di 25 persona
Na Merka 25 persona a pèrdè nan bida ora ku un eksploshon a surgi den un mina di karbon. Kuater persona a disparsé. Dos trahadó di mina ta den hòspital. E eksploshon a tuma lugá den un mina na Montocoal, sùit di Charleston na e suidat West Virginia. Parti di e shaft di mina a kai den otro. Trahadónan di reskate ta buskando sobrebibiente. No sa kiko a okashoná e eksploshon. Probablemente un pipa a lèk gas di metano.

Dia 6 di mei Gran Britania ta bai urna
Dia 6 di mei pueblo di Gran Bretaña ta bai urna pa elegí un parlamentu nobo. Segun fuente di partido Labour, promé minister britániko Gordon Brown lo hasi e anunsio despues di pidi reina Elisabeth disolvé e parlamento aktual. E fecha 6 di mei no ta bini komo sorpresa. Tabata spera ku elekshon lo a tuma lugá na mei. David Cameron di partido Konservativo i Nick Clegg di partido Liberal Demokrátiko ta rivalnan serio di Brown. Nan lo topa otro durante un debate na televishon britániko. Ta promé bes den historia ku lidernan polítiko ta enfrentá otro den un debate. Otro kos úniko ta ku niun di e partidonan lo logra haña mayoria konsekutivo pa drenta 'House of Commons', ku ta parlamento britániko. Den e kaso ei lo tin ku forma un koalishon. Tópikonan importante durante elekshon ta: ekonomia, belásten i sektor públiko.

Movementu di resistensia afrikano ta hala deklarashon di guera aden
Movementu di resistensia afrikano ta hala deklarashon di guera aden na Sur Afrika. A hasi e deklarashon na momentu ku a mata lider Eugène Terre'Blanche. Djasabra a asesiná e lider di movementu ekstrimista derechista Terre'Blanche. Probablemente dos mucha hòmber di 21 i 15 aña a kometé e akto despues di un pleitu tokante salario. Segun polis e morto no tin un kousa polítiko. Bosero di e movementu, Pieter Steyn, a tuma tur deklarashon bèk ku sekretario general di Terre'Blanche a hasi. E deklarashonnan lo ta di índole rasista. Steyn a deklará ku ta ekspreshonnan di rabia. "Niun miembro di e movementu lo hasi nan mes kulpabel di violensha o intimidashon" asina e bosero a bisa.

A mata trafikadó di droga hapones na China
Na China a eksekutá un trafikadó di droga hapones. E hòmber di 65 aña ta e promé Hapones ku outoridatnan chines ta mata despues ku e paisnan a drecha nan relashon diplomátiko na 1972. A ehekutá pena di morto dje hòmber na Liaoning, un provinsia na nort ost di China. Na 2006 a arest'é na aeropuerto ora a deskubrí ku e ta'tin droga den su poder. Peking a anunsiá ku djaweps awor ta kita bida di 3 Hapones mas ku tambe a trafiká droga. Rònt mundu China ta konosí komo e pais ku e mayor kantidat di ehekushon di pena di morto. Segun organisashonnan humanitario ta trata di miles di sentensia di morto. Peking no ke duna klaridat di e kantidat eksakto di persona ku ta haña pena di morto. Siman pasá Amnesty International a reta outoridatnan chines pa anunsiá kuantu persona nan a likidá aña pasá.

PVV ke baha kantidat di emisora públiko i ke deshasí di Wereldomroep
PVV ke baha kantidat di emisora di televishon públiko. Aktualmente tin 3 emisora di televishon públiko. PVV ke pa tin solamente 1 i pa eliminá Wereldomroep. Ta uza e sèn ku sobra pa invertí den kuido pa asina e keda pagabel. Asina ta pará den programa di elekshon ku pronto PVV lo presentá. Geert Wilders, lider di PVV, ta haña ku emisoranan di televishon públiko ta kosta mas ku 700 mion euro pa aña. Sèn ku gobièrnu hulandes ta supsidiá. Ku e montante grandi di sèn nan ta kompetí di un manera inhustu ku emisoranan komersial. "Ta mihó ekonomisá ku e gastunan aki ku kremenchá ku gastunan di kuido", asina Wilders ta opiná den Algemeen Dagblad.

Pronóstiko di tempu
Awemèrdia solo ta bria tur kaminda. Temperatura ta 17 grado. Ta na Islanan Wadden so lo keda 11 grado. Mañan tambe lo ta solo solo ku un temperatura di 16 grado. Anochi tin chèns ku awa ta kai.