Joran van der Sloot ta den man di polis peruano
Polis chileno a entregá Joran van der Sloot na outoridatnan peruano. A transportá Van der Sloot ku tabatin un chaketa antibala bistí, den un avioneta di polis pa nort di Chile. Ei polis peruano a arest'é djabièrne anochi. A transport'é pa medio di un outo pa kapital Lima. Outoridatnan ta sospechá Joran van der Sloot di 22 aña di asesinato di Stephany Flores di 21 aña den su kamber di hotèl na Lima. El a bandoná e kamber di hotèl djaluna i a biaha den un taksi pa Chile. Ei a arest'é ayera. Van der Sloot ta desmentí tur akusashon. Segun un polis chileno ku ta enkargá ku e investigashon di asesinato, Van der Sloot a deklará solamente ku e ta korda ku el a bai ku Stephany Flores un kasino na Lima i ku despues a arest'é.

Kompania petrolero BP tòg lo duna su akshonistanan dividènt
E kompania petrolero BP lo duna su akshonistanan dividènt, apesar di krítika di presidente Obama. E presidente merikano a kritiká e pagonan akí. E ta haña ku promé BP mester kumpli ku su obligashonnan finansiero na e habitantenan na kosta di Golfo di Méhiko. Banda di esei Obama ta eksihí di BP pa e kompania mes paga sobra dje gastunan dje daño. BP a bisa den un deklarashon ku nan lo no skrap e pago di dividènt. E kompania ta haña pago di dividènt importante. Ayera Obama a bishitá pa di tres biá e área di desaster. Denter di algun dia lo sali na kla si e kapa ku a pone riba e tubu di zeta, ta wanta e lèkmentu den laman.

Israel a wanta atrobe un barku ku material di ayudo pa zona di Gaza
Israel a bolbe wanta un barku ku material di ayudo pa zona di Gaza. Asina televishon israeli i ehersito a bisa. e tripulashon no a oponé. Ehersito israeli tabata ke pa e barku nabega bai un haf sur di Israel. Pero e kapitan a ninga pa hasi esaki.

Mester lanta komishon pa yega na pas ku Taliban
Religiosonan afgano i lidernan étniko ke lanta un komishon ku lo mester negoshá tokante pas ku miembronan moderá di Taliban. A disidí esaki riba e delaster dia di un kongreso di pas na Kabul, na kua mas o ménos mil 600 lider a asistí. E negosashonnan di pas ku Taliban, mester tuma lugá pafó di Afganistan. Komo kandidatonan a menshoná entre otro Turkia i Saudi Arabia. Taliban a kometé un atake djarason último, nèt na momentu dje diskurso di apertura di presidente afgano Karzai. A kai morto solamente di banda dje bringadónan di Taliban. E enkuentro a transkurí despues trankil.

Forsa di kompra di famia ku ònderstant ta bai atras serka CDA, PVV, D66 i VVD
Ofisina di investigashon Nyfer a kalkulá e konsekuenshanan dje programanan di partido, riba e forsa di kompra di seis famia modelo. Kalkulashonnan dje ofisina sentral di planifikashon a duna solamente un bista general dje forsa di kompra. Segun Nyfer forsa di kompra di sinku dje seis famianan ku a partisipá na e investigashon, ta bai basta dilanti, serka e partido SP. Solamente serka famianan ku yu, ku un entrado konhuntu di reim un ton, e forsa di kompra ta keda meskos. Serka PvdA i GroenLinks forsa di kompra di tur seis famia ta bai dilanti, pero ménos ku serka SP. Mamanan ku ta risibí onderstant lo tin'é malu serka CDA, PVV i D66, i prinsipalmente serka VVD. Serka VVD nan forsa di kompra ta baha ku shen euro pa luna. Penshonadonan ku un penshun chikitu, lo tin ménos pa gasta serka CDA i D66. Nyfer a kalkulá e konsekuenshanan di forsa di kompra riba enkargo di e korant De Volkskrant.

Ayudo di emergensia di 75 mil euro di Hulanda na Guatemala
Hulanda ta duna pa medio di Krùs Kòrá 75 mil euro pa ayudo di emergensia na víktimanan dje tormenta tropikal na Guatemala. Asina ministerio di Asuntunan di eksterior a anunsiá. Ta trata di entre otro alimento, awa, akohida di emergensia i kuido di salubridat. Segun Nashonnan Uní, sigur shen sinkuenta i dos hende a muri debi na e tormenta tropikal. Shen sinkuenta hende a keda daklos. Aparte di Hulanda, tambe Spaña i Norwega ta envolví den e ayudo di emergensia na Guatemala.

Algun partido kontentu ku akuerdo pa subi edat di penshun
Promé minister Balkenende, lider di VVD Rutte i lider di PvdA Cohen ta kontentu ku e akuerdo ku doñonan di trabou i trahadónan a yega na dje ayera tokante oumentu dje edat pa risibí penshun di behes. Balkenende ku a enfatisá ku e ta papia komo promé minister, a bisa ku dje manera ei ta garantisá e base di sosten pa e oumentu. Cohen tambe a bisa algu similar. Lo no straña Cohen si e akuerdo lo kondusí na un oumentu te ku 67 aña na 2025. Lider di VVD Rutte tin ainda algun pregunta tokante e espasio di tempu den kua lo oumentá e edat. SP ta fuertemente kontra un oumentu di edat pa risibí penshun i ta haña ku no tabata un kos bon dje partnernan soshal pa yega na un akuerdo promé ku elekshon.

Wilders ta boga pa unidat speshal kontra terorismo di kaya
Lider di PVV Geert Wilders ta boga pa lanta un unidat speshal di mil polis kontra terorismo riba kaya. Lo usa e polis speshalnan aki tur kaminda na Hulanda tambe sin ku alkalde di un munisipio pidi pa esaki. Minister di un ministerio nobo di Seguridat lo mester guia e unidat speshal. E ministerio di Seguridat mester ta un union dje ministerionan di Hustisia i Asuntunan Interno. E unidat di terorismo di kaya lo por drenta den akshon riba petishon di un alkalde. Pero si un alkalde iskierdista no ta dùrf aktua, e minister nobo di seguridat si por duna ordu na e polisnan speshal pa aktua.

Euro ta bou un doler 20
Euro ta pa promé biá den kuater aña, bou di un doler i 20 sen. Un euro ta kosta awor un doler i 19 sen, na e paisnan den zona di euro, debí na prekupashonnan tokante e dèfisit di gobièrnunan.

Pronóstiko di tempu na Hulanda
Awe atrobe un dia bunita yen di solo, aki na Hulanda. Temperatura ta máksimal 26 grado. Den trankusro di dia chèns riba poko awaseru.

© ANP/AFP