Boletin di Notisia di 13or di mèrdia

Pániko riba De Dam durante seremonia konmemorativo pa fayesidonan di Guera Mundial
E Komemorashon di Defuntu di Guera a keda strobá pa korto tempu. Esaki a sosodé durante di e dos minüt di silensio. E sospechoso, bistí na trahe di hudiu òrtodòks, durante e silensio a kuminsá murmurá inkomprensibel,. despues el a hisa man kuminsa grita. Polis a someté rápidamente. E h`mber tabata un habitante di Amsterdam konosí seka polis. Den pasado a sentensi'é pa entre otro ladronisia, trafikashon di droga i violensia. Hendenan den públiko a haña pániko i a grita ku tin un bòm. Hekinan a basha bou i den e disturbio a trapa desenas di hende. Mester a hiba algun di nan hòspital ku herida leve. Mesora a hiba Famia Real un lugá sigur, pero despues di algun minüt nan a bini bèk i a risibi hopi aplousa. Segun hefe di kuerpo di polis Welten ta Reina Beatris mes kera kontinuá e komemorashon, kaminda tabatin 20 mil hende presente. despues di e seremonia Reina Beatris, Prens Willem-Alexander i prensès Máxima a bishitá e víktimanan.

Hulanda ta selebrá dia di liberashon
Rònt Hulanda tin un gran kantidat di aktividat pa selebrá fin di e yugo Nazi durante Segundo Guera Mundial. E tema sentral di e selebrashon ta: Libertat Mundial. Despues di e disturbio di e Komemorashon Nashonal di Defuntu, polis i alkaldenan tur kaminda lo revisa e instrukshonnan di seguridat, pero ta sigur si ku na Amsterdam tur festividatnan lo sigui.
For di mei anochi, saliendo for di Wageningen tin miles di koredó na pia, koredó di baiskel i koredó di skate na kaminda pa 140 siudat i pueblo den Hulanda. Nan ta karga flanbeu di e kandela di liberashon ku a sende ayera na Hotel de Wereld

Sekretario di estado di Defensa De Vries ta haña ku Hulanda mester sigui traha pa libertat den mundu
Na e komemorashon riba e vèlt di honor na Loenen el a bisa ku Hulanda no mester retirá tras di dèik di interes propio. Ësaki no ta pas ku nos pasado", e sekretario di estado di CDA a bisa. Riba e vèlt di honor tin mas ku 3600 víktima di guera derá. Na Kamp Holland na Afganistan tambe a tene un Komemorashon di Defuntu. Nan a tene dos minüt di silensio i a lesa nòmbernan di e militarnan hulandes ku a fayesé

Outor dje atentado frakasá na New York a sigui treinen serka terorista
E sospechado di e atentado ku a faya na Times Square na New York a sigui un treinen na un kampo di terorista na Pakistan. Asina e hòmber, Faisal Shahzad a bisa FBI.  El a bisa ku e atentado tabata un akshon di dje so, pero ta sigui investiga ku no tabatin un grupo di teror tras di e akshon tòg. Shazad, un merikano di desendensha pakistano, a keda arestá na un aeropuerto na New York. Ta sospech'é ku e kera laga un outo eksplotá riba Times Square. Na Pakistan a arestá un kantidat deskonosí di famia di e sospechoso.

Maleta sospechoso na airopuerto di Houston, Texas
Na aeropuerto di Houston na Texas tabatin un insidente ku un maleta sospechoso riba un buelo di KLM. Un trahado di e departamentu di ekipahe ku tabta kargando e avion a tende un zonidu duru i a mira huma sali for di un di e maletanan. Ekspertonan di bòm ku a alarmá a listra e maleta; no tabatin nada peligroso denm dje. No ta sigur ta di kiko e huma a bini. E Boeing di KLM a sali sinku ora mas lat ku a planeá di Houston pa Amsterdam.

Ocho prezu a muri den prizòn na Venesuela
Na Venesuela 8 prezo a fayesé den disturbio den un prizòn. Den e prizon na Caracas miembronan di guèn rival a kuminsá bringa ku otro. E situashon di seguridat den prizon venesolano ta malísimo. Organisashonnan di derecho humano ta bisa ku aña pasá 366 prezo a fayesé pa motibu di violensha.

Elekshon lo keda wantá na Islanan Filipinas
E elekshonnan na Filipinas, ku ta planea pa dia 10 di mèi probablemente lo keda posponé. Tin problema tékniko ku e mashinnan di vota. Asina un bosero di presidenteGloria Arroyo a bisa. E bosero a pone ku niun hende lo no benefisiá di un bruashon durante di elekshonnan i ta pesei no ta straño ku lo posponé nan, si no resolvé e problemanman tékniko na tempu. Algun dia pasá e komishon di vota a laga sa ku pa motibu di e karchinan di memoria den e kompiuternan mester kambia e sòftware di 76 mil mashin. Kasi sinkuenta mion Filipino a haña un konvokashon pa djaluna awo skohe un presidente nobo i miles di mandatario.

Atrobe problema ku shinishi di volkan islandes
Tur airopuerto na Eskosia i Nort Irlandia a sera awe meinta 8or ora lokal. Outoridatnan britániko a tuma e medida pa motibu di e nubia di shinishi di e volkan na Islandia. Bientu a bòltu i ta supla e shinishi den direkshon di Gran Britania. Chèns ta grandi ku Inglatera i Wales tambe mester skrap buelo pa motibu di e nubia di shinishi.

Sindikato militar ACOM rabiá ku Defensa
E bònt di militar ACOM ta rabiá pa motibu di un karta di ministerio di Defensa kaminda ta taha militar di papia ku parlamentario. A invitá algun militar pa un konferensha di mesa rondo tokante un lèi nobo kaminda ta regla kuido di veterano. E ministerio no ta pèrmiti e militarnan di partisipá na un konferensha ku parlamentario. Presidente di ACOM Jan Kleian ta kera ku ta pasobra e bòntnan i algun partido polítiko ke regla mas tantu kos den e Lèi di Veterano ku e sekretario di estado mes ke. Kontra Wereldomroep Kleian a bisa ku ta despresiabel ku militarnan di Defensa no tin pèrmit di papia representantenan elegí di pueblo. Nos ta biba den un demokrasia, no na Nort Korea, Kleian ta bisa.

Pronóstiko di wer
Solo i nubia ta alterná otro. Tin tiki bientu i lo bira 10 grado den nort i 14 den suit ost. Despues di awe wer lo keda kambia ku áwaseru debesenkuando i temperaturanan di un máksimo di 12 grado.