Boletin di notisia, 5 di mart, 12:00 or

Aki dos aña ta kontraé matrimonio homoseksual den munisipio antiano
Pareha homoseksual probablemente por kasa aki dos aña na Boneiru, Statia, i Saba. Sekretario di Estado demishonario Ank Bijleveld di Relashonnan den Reino no ta resistí un kambio di legislashon mas ku ta hasi esaki posibel. Asina a sali for di un debate den parlamentu tokante futuro di islanan BES. Parlamentu anteriormente a laga sa ku nan ta pro introdukshon di matrimonio homoseksual na Antia i Aruba, pero te awor Bijleveld tabata tene kuenta mas o ménos ku e resistensia na e islanan mes. Parlamento no a yega mas leu ku proposishonnan pa hasi eutanasia i aborto posibel denter di un aña riba e islanan, pasó Bijleveld ta husga ku ta muchu lihé. E lèinan nobo ta nesesario komo ku Boneiru, Statia i Saba lo bira munisipio ekstraordinario di Hulanda. Bijleveld ta sali for di e punto di bista ku e fecha planeá di 10 di òktober lo sigui normal, maske gabinete hulandes a kai.
 

Lider di SP Agnes Kant ta baha despues di resultado malu di elekshon
Agnes Kant ta baha komo lider di SP i lo no para na kabes di lista den e elekshonnan binidero di 9 di yüni. Kant a deklará esaki despues di a reuní ku su frakshon. E no ke para riba e lista di kandidato nobo i ta p'esei e lo sali for di polítika. Na e elekshonnan pa konseho munisipal di djárason último SP tabata un di e gran pèrdèdónan. Den sondeonan pa elekshonnan pa parlamento e partido ta pèrdè 14 asiento. Awe lo bisa ta ken ta bai sigui Agnes Kant komo lider di frakshon. Kongreso di e partido lo skohe e kabes di lista nobo. Kant su predesesor Jan Marijnissen ya kaba a laga sa ku e si no ta bini bèk, i parlamentario Harry van Bommel tambe a bisa ku e no ta disponibel.
 

PvdA ku koalishon 'Paars-plus' na Amsterdam i Den Haag
Frakshonnan di PvdA na Amsterdam i Den Haag, kaminda e partido a keda esun di mas grandi despues di elekshonnan munisipal, ta bai trata na forma un gobièrno munisipal huntu ku VVD, GroenLinks i D66. E asina yama koalishon Paars-plus ta distinto for di e koalishonnan aktual den siudatnan i ta sobretodo resultado di bentaha elektoral di D66 i GroenLinks. Pa Den Haag esaki lo ke men ku PVV, ku a sali e di dos partido na Den Haag, lo drenta oposishon. Na Rotterdam ainda no tin resultado ofishal pasobra a entregá protesta kontra iregularidat na algun urna. Leefbaar Rotterdam i PvdA tur dos tin 14 asiento, ku un porsentahe chiki na fabor di PvdA.
 

Inklaridat na Chile pa loke ta e kantidat di morto
Na Chile no tin klaridat enkuanto e kantidat di morto den e temblor i tsunami di siman pasá. Segun gobièrnu na Santiago esaki ta pa motibu ku nan no sa kuantu hende a pèrdè. Tin be a konta nan kaba den e kantidat di morto di 802. Awo outoridatnan ta mantené e sifra di morto ofishal riba 279; esaki ta kuadra ku e víktimanan morto ku a identifiká. Kon ku bai bin e kantidat di 279 lo subi, pasobra vários resto mortal no a keda identifiká. E kantidat di Hulandes ku no a tende nada di dje a baha bira shete. Ministerio di Asuntunan Eksterior hulandes ta enfatisá ku no tin indikashon konkreto ku tin Hulandes entre e víktimanan di e temblor. Entretantu gobièrno chileno a deklará tres dia di luto nashonal, kuminsando djadumingu awó.
 

Wereldomroep ta manda stashon di radio portátil pa Chile
Radio Nederland Wereldomroep ta manda dos transmisor di radio portátil pa Chile. E transmisornan ta pa e organisashon di emisora Radio Universidat Técnica Federico Santa Maria (RUNFSM), ku ta sosio di Wereldomroep pa años kaba. Ku e akshon di ayudo Wereldomroep ke kontribuí na drechamentu di servisio di informashon na Chile. E transmisornan portátil ta pa dos emisora ku mester skohe ainda na pueblonan chikí na kosta, n'e region di Maule, n'e parti sentral di Chile.

Atentado di Pasku mester a faya bèrdè
E atentado ku un Nigeriano kera kometé Pasku den un avion kaminda pa Estados Unidos tabata destiná pa faya. E eksplosivonan ku Umar Farouk Abdulmutalleb tabatin den su poder, di niun manera no tabata sufisientemente fuerte pa pone e avion rementá. Esaki a sali for di un eksperimento ku trahadónan di un dokumentario di BBC a hasi. Ekspertonan a imitá kiko lo a pasa si e outor a laga e eksplosivonan riba su kurpa eksplotá. Den e kaso ei e mes lo a muri i probablemente esun sintá bande dje tambe. Den práktika ta un parti di e material so lo a eksplotá, esta esun sumamente eksplosivo yamá PETN, ku tabata kosé den su pañanan djabou. Danki na e intervenshon akshon rápido di un pasahero hulandes nasé na Antia por a dominá e hòmber, ku a resultá gravemente heridá.
 

Retraso por kosta kompanianan di aviashon hopi plaka
Pasahero di avion hulandes ku un retraso di mas ku tres ora por kobra te 600 euro seka nan kompania aéreo. Korte di Hustisia Oropeo a dikta esaki for di fin di aña pasá, pero awo numa e ta konta pa pasahero hulandes, pasobra un wes hulandes a disidí, asina De Volkskrant ta informá. Pasahero ku a sufri daño por kleim esaki ku forsa retroaktivo pa retrasonan ku a tuma lugá último sinku aña. Kompanianan aéreo oropeo tin miedu ku nan ta bai haña nan ta paga nan pasaheronan entre 3 i 5 miar tur aña.
 

Turkia hopi rabiá ku Estádos Unídos
Estados Unidos a inkurí rabia di Turkia, un di su aliadonan den OTAN. Un komishon di Kámara di Delegado (komishon parlamentario merikanu) a aseptá un resolushon kaminda ta denominá e persekushon turko di Armenionan den promé Guera Mundial komo genosida. E asuntu aki ta masha delikado na Turkia. Ánkara ta atmití si ku sentenares di hende di Armenia a fayesé, pero no ta haña ku a asesiná nan, ni segun plan ni sistemátikamente. Pa años kaba Armenionan i hopi historadó ta papia di genosida. Turkia ta asina rabiá, ku nan a manda yama nan embahador bèk for di Washington.
 

Pronóstiko di wer
Nubia ta kumulando i awe mèrdia for di nortwest lo bini awaseru i sneu muhá. Tin basta bientu i lo bira 5 grado. Mayan lo ta seku, solo ta bria i lo bira friu, 0 te 4 grado.