Boletin di Notisia di 12 or di mèrdia

A demandá 25 aña di prizòn pa èks diktador argentino
Estado argentino a demandá 25 aña di kastigu di prizòn den e kaso kontra èks diktador Reynaldo Bignone. Ta akusá é i sinku otro èks general di krimen kontra humanidat durante régimen di e hunta militar di 1976 te 1983. Ta kulpa nan di entre otro torrtura, sekuestro di mucha i di a laga supuesto miembronan di oposishon disparsé. Bignone, aktualmente di edat di 81 aña, tabata presidente di Argentina di yüli '82 te desèmber '83, ku alabes tabata e últimi añ'i mei di e régimen militar. El a bira susesor di Leopoldo Galtieri, ku mester a bandoná su puesto despues ku Argentina a pèrdè e guera ku Gran Bretaña pa motibu di Islanan Malvinas. Ta kalkulá ku 30.000 hende a disparsé na Argentina tempu ku e hunta militar tabata na mando.

A denunsiá dies Merikanu na Haiti pa kontrabanda di mucha
Na Haiti a denunsiá dies Merikanu ya ku nan lo a trata di saka 33 mucha ilegalmente for di e pais. Ta trata di sinku hòmber i sinku muhé. Nan ta miembro di komunidat boutista di estado Idaho na Merka. Siman pasá a detené nan na frontera ku Repúblika Dominikano. E Merikanunan ta pretendé ku e muchanan a pèrdè nan mayor den e temblor na Haiti. Nan a bisa ku nan kier a hiba e muchanan Estados Unídos via Santo Domingo, pa ofresé nan un mió bida ku na nan pais destrosá. Pero a resultá ku mayornan di algun di e muchanan tabata na bida mashá bon. E Merikanunan ta riska kastigu largu di prizòn.

Hulanda ta yuda Haiti purifiká aw'i bebe
Haïti a risibí sinku instalashon móbil di Hulanda pa purifikashon di aw'i bebe . E kompania di awa di provinsia Noord-Holland, ku a hiba e instalashonnan pa e pais, ta bisa ku esaki ta pone un kuart mion di Haitiano disponé di aw'i bebe konfiabel. Djis despues di e temblor, seis mòntùr di e kompania di awa a biaha pa Haiti pa instalá e aparatonan pa purifiká awa. Ayera e kolaboradornan a regresá Hulanda. Huntu ku kolaboradornan di Cordaid Mensen in Nood, nan a instalá e unidatnan di filtra awa pegá ku riu i otro fuente di awa dushi na kuater munisipio, ku e temblor a asotá seriamente den bisindario di kapital Port-au-Prince. Na 2004 a traha e instalashon di purifiká awa yamá Perfector-E,  despues ku e tsunami a ras na Asia. E instalashonnan ta purifiká awa dushi hasié awa di bebe limpi. Radio Nederland Wereldomroep tambe ta koperá ku Haiti i ta manda un emisora di radio móbil entreotro pa yuda buska hende ku a pèrdè na e pais.

Dòmi ateísta ulandes por keda predikadó pa iglesia protestant
E dòmi ateísta Hendrikse tin mag di keda predikadó di Iglesia Protestant na Hulanda. Den reunion di Iglesia protestant regional na Zierikzee a disidí ku su puntonan di bista en esensia no ta desviá di otro teólogonan liberal den seno di Iglesia. Ta p'esei a para e kaso kontra su persona. Mas o ménos un kuart di e delegadonan a vota kontra den e reunion di iglesia. E konseho protestant di provinsia Zeeland a investigá e asuntu di dòmi Hendrikse, despues ku a surgi konmoshon ku su buki titulá Geloven in een God die niet bestaat, o sea Kere den un Dios ku no ta eksistí. Den e buki akí Hendrikse a skibi ku Dios no ta eksistí, sino ku e ta 'surgi'. Den kurso di e aña akí direktiva nashonal di PKN lo deliberá riba e forma ku mester papia di Dios den Iglesia. Hendrikse ta predikadó den komunidatnan reformá na Middelburg i Zierikzee.

Awaseru torensial no tin fin di stòp na Sao Paolo
For di prinsipio di desèmber ku un tremendo áwaseru a kuminsá kai na Sao Paolo na Brazil, e no a stòp mas. Ayera un tormenta pisá a kaba di kompletá e desaster i a eksigí bida di un dama di 72 aña di edat.
Un oleada repentino di awa a lastra e señora í seis kas bai kune. E dama ta e di 73 víktima for di komienso di e loke ta yama e 'zomer mas muá' na Sao Paolo di último 60 aña'. Un total di 32 zona di e siudat di miones di habitante ta pará bou di awa. E fluho di awa a ranka desénas di palu di mata ku rais ku tur bai kune. Tambe a drenta notifikashon di konvoinan ku a straik i hende ku ta kore subi dak di outo, pa awa no bai ku nan.

Un seri di avalancha a mata kuater hende na Oustria
Na Oustria a muri kuater hende último dianan pa motibu di un seri di avalancha di sneu. Ayera mes servisio di reskate di Kasberg, un risòrt di ski, a haña kurpa sin bida di un dama oustriako di 26 aña di edat, derá den sneu. Antiayera mes un avalancha di sneu a sorprendé dos turista aleman, amante di deporte di wenter na Bregenzerwald, un region ubiká parti wèst di Oustria. No muchu leu for di einan, esta na e risòrt di ski Sankt Anton am Alberg, un hòmber di Tirol a pèrdè su bida, tambe pa motibu di un avalancha di sneu. Den serunan di Alpen na Alemania sneu a basha abou tapa un militar britániko den serkania di Oberstdorf, ku tambe ta un risòrt di ski. Por a reskatá dos otro sòldá sí na tempu, promé ku sneu dera nan. E trio tabata forma parti di un grupo di 27 militar britániko, ku tabata siguiendo un kurso di ski n'e parti zùit di Alemania. Outoridatnan di e paisnan alpino entretantu a atvertí pa mas menasa di avalancha di sneu, sobretodo den e áreanan pafó di e pistanan ofisial di ski.

Deporte-futbòl di promé divishon na Hulanda
Feyenoord di Rotterdam a gana RKC Waalwijk ku mashá doló den un partido di promé divishon. E skor tabata 1 pa 0. Jon Dahl Tomasson a hinka e úniko gol djis despues di sosiegu. E triunfo di Feyenoord ta pone posishon di e ekipo bira mas firme riba e di kuater puesto.

Pronóstiko di tempu:
Shelu ta nubla mas i mas kuminsando n'e region parti zùit di Hulanda. Debésenkuando awa ta kai. Temperatura ta mas o ménos 6 grado riba sero. Mañan djasabra áwaseru lo kai un tiki, pero tin poko solo tambe, temperatura ta 5 grado riba sero. Despues lo bira seku, pero mas friu sí.