Boletin di Notisia di 13 or

Temblor a sakudí península mehikano Baja California
Na estado federal mehikano Baja California a surgi un temblor di 7.2 riba eskala di Richter. Episentro dje temblor tabata na 170 kilometer zùitost di siudat Tijuana, no muchu leu di frontera ku Estados Unídos. A kai ún morto; ta trata djun hòmber ku a keda derá bou di ruina di su kas ku a bash'abou na Mexicali, kapital di Baja California, n'un distansha di 20 kilometer for dje episentro. Tambe a drenta notifikashon di desénas di hende levemente eridá. Algun edifisio a sufri daño na Mexicali. Por a sinti e temblor na San Diego i Los Angeles tambe na estado merikanu California. Brantwer mester a ranka sali na gran eskala na Los Angeles pa saka hende for di left, ku a pega. Despues dje teremoto, e region nortwèst di Méhiko i esun zùitwèst di Estados Unídos a sigui tembla fuertemente. Ultimo dianan por a sinti tera tembla un tiki kaba n'e region. 
 
Sentenáres di morto den Semana Santa na Latinoamérika
Na Latinoamérika a kai sentenáres di morto den vários insidente ku a surgi durante Semana Santa. Na Guatemala so kaba a muri por lo ménos 100 hende den e siman ku ta tras di lomba. Mayoria a pèrdè nan bida despues ku a tira òf hinka nan mata. Tambe a kai desénas di víktima den desgrasia di tráfiko òf pasó nan a hoga. Na Nicaragua a muri por lo ménos 64 persona, na Honduras mas ku 50 i na Paraguay komo 30 hende. Tambe na Costa Rica, El Salvador i República Dominicana desénas di hende a fayesé durante Semana Santa. Na Latinoamérika tur hende ta liber den e periodo di Dumingu di Rama te ku Pasku di Resurekshon i tin masha hopi festividat.
 
Kuater morto durante protesta di mineronan na Perú
Na zùit di Perú a surgi un konfrontashon entre polis ántimotin i mineronan dje region, ku a eksigí bida di kuater hende. Komo 7000 minero dje region di Arequipa a blòkia e ruta di tránsito mas importante di Suramérika, o sea outopista Pánamerikano. Den e intento pa habri kaminda bèk, polis a tira tres minero mata. Un taksista riba motosaikel, ku a pasa eibanda pa kasualidat tambe a haña bala mortal. Ademas di esei 15 hende a keda eridá.  E mineronan ta protestá kontra plannan di gobièrnu pa implementá regla mas severo p'e minanan. Nan tin mied'i pèrdè nan djòp si en lo futuro mester di pèrmit di trabou. E mineronan ku ta protestando no ta den servisio di doño di mina. Ta riba nan mes kuenta nan ta buska oro òf otro tipo di materia prima. 
 
Misa tradishonal di Papa riba Plasa San Pedro na Roma
Papa Benedikto 16 a hasi misa tradishonal di Pasku na Plasa San Pedro na Roma. N'e okashon ei e sumo pontífise no a bisa nada dje asuntu di abuzu seksual den seno di Iglesia Katóliko Romano. El a bisa sí ku hende mester 'konvertí spiritual i moralmente atrobe'. Papa a bisa ku esaki ta nesesario pa sali for djun krísis profundo. Desénas di miles di kreyente a presensiá e misa pará den áwaseru na Plasa San Pedro. Ora misa a kaba, Papa a ekspresá su deseo di Pasku den 65 idioma. Manera kustumber el a gradisí Hulanda p'e flornan regalá. El a deseá Katólikonan hulandes un 'zalig Pasen'. E aña'kí ta pa promé biá ku Papa a deseá bon Pasku den idioma di Kazakstan i di Islandia. 
 
Aresto di dos muhé despues di morto di chikitín na Eindhoven
Polis di Eindhoven a detené dos muhé en konekshon ku morto di un mucha muhé chikí di 2 aña. Djasabra e muhénan a drenta hòspital ku e chiktín gravemente eridá. E mucha a fayesé den kurso di dia. Probablemente ta trata djun krimen. A arestá e muhénan na hòspital mes. Un di nan ta mama dje mucha. E tin 21 aña i e ta biba na Drachten. E otro un ta 20 aña i e ta bin di Valkenswaard. Polis ta listrando kas di un di nan. Parse ku tabatin un fiesta andando einan, pero no ta kla ainda kiko a sosodé presisamente. 
 
Kantante Sugar Lee Hooper di Hulanda a fayesé
Kantante ulandes Sugar Lee Hooper a fayesé ayera mainta na Den Haag. Su nòmber di bèrdat ta Marja van der Toorn i el a bai sosegá na edat di 62 aña. Siman pasá a operá e kantante na su hep despues k'el a kai for di skutmobil. Su kurason a para durante operashon. E tabata falta oksígeno i el kai den koma. For dje momento ei e no a spièrta mas. Sugar Lee Hooper tabata konosí komo kantante i entertainer. E tabata kai hopi na bista riba esenario ulandes ku kabes limpi, kurpa balente i estilo di bisti ekstrabagante.
 
Eskritor ulandes Rudy Kousbroek a bai sosegá
Eskritor Rudy Kousbroek tambe a fayesé. E tabata entre otro ensayista pa e vespertino NRC Handelsblad. 
Kousbroek a nase na Nederlands-Indië, e anterior kolonia ulandes, ku a bira independiente na 1946 i ku awendia yama Indonesia. El a studia Matemátika i Siensia Natural na Amsterdam. Na Paris el a studia idioma hapones. Su obranan mas konosí ta De Aaibaarheidsfactor i e serie Anathema's. Na 1953 Kousbroek a hasi su debut komo eskritor di un buki di poesía. El a skibi vários otro buki tambe i na 1975 el a risibí P.C. Hooftprijs pa henter su kolekshon di obra. Rudy Kousbroek tabata malu basta ten kaba. El a bai sosegá na edat di 80 aña. 
 
Deporte-futbòl
Ajax a derotá ADO Den Haag ku skor di 1-0, miéntras ku PSV a gana Willem II ku e mésun skor. FC Twente ta kétubai na kabes sí den sekshon di promé divishon hulandes.
 
Wer na Hulanda
Mainta ta seku i solo ta bria basta. Den oranan di atardi shelu ta nubla i awa por kai òf spat den nòrt. Temperatura ta 10 te 12 grado. Mañan ta seku i tin basta solo, temperatura máksimo ta entre 14 i 17 grado. Despues di djárason awa ta kuminsá kai atrobe i temperatura lo baha un tiki.