Boletin di notisia di 12or di mèrdia

Resultado elekshon pa konseho munisipal na Hulanda
PVV i D66 ta e gran ganadónan di elekshon pa konseho munisipal. VVD, GroenLinks i tur partido lokal huntu tambe a bai dilanti den kantidat di asiento. PvdA a pèrdè sentenares di asiento i CDA i SP tambe a pèrdè. PVV a partisipá na Den Haag i Almere so. Na Den Haag el a bira e di dos partido i na Almere esun di mas grandi. Na Den Haag ta PvdA ta keda esun di mas grandi, apesar k'el a pèrdè mahos. Na Amsterdam ta mesun istoria. Na Rotterdam ainda no a kaba di konta tur voto, ma PvdA i Leefbaar Rotterdam te awo tin kasi mes tantu voto. Ta te mayan lo sa e resultado. Ta promé bia ku Trots op Nederland, ku no a partisipá tur kaminda, ta drenta den basta konseho di munisipio.
Promé minister Balkenende i alabes kabesante di CDA a bisa ku e lo a preferá un mihó resultado den e elekshonnan aki, pero el a enfatisá ku CDA ta keda e partido di mas grandi. Lider di PvdA Bos di ku tabata di ferwagt ku PvdA lo a pèrdè pasobra den e último elekshon pa rat nan tabata tin un resultado ekselente. Pero segun e, PvdA ta bèk den kareda. Lider di PVV, Wilders, a yama e resultado na Almere i Den Haag un trampolin pa sobrá region di Hulanda. Dia 9 di yüni nos lo bira e partido di mas grandi di Hulanda, asina el a bisa. Mark Rutte, dirigente di VVD a papia di un anochi bunita pa su partido, ku ta mustra ku el a kue rumbo di avanse. Pechtold di D66 a diskribí su sintimento asina: Sí, nos ta bèk.
Den un debate final na NOS, Balkenende a ripití ku e no ta eksklui PVV komo un posibel partido di koalishon, pero ku e tin problema fundamental ku e partido sí. Bos ta haña CDA su aktitut relashoná ku PVV deshonorabel. Presensha na e elekshonnan munisipal aki tabata histórikamente abou. Ku un konteo di kasi tur voto por bisa ku 53 porshento a bin vota. Na aña 2006 esaki tabata 58 porshento.

Kòrsou tin gasolin atrobe
Na Kòrsou outomobilista por kumpra gasolin atrobe. E blokeo di refineria Isla, ku a kuminsá ayera meinta, a kaba. E akshonistanan tabata tene e entradanan será i asina niun trùk di gasolin no por a pasa. E wèlga tin di aber ku e interferenshanan ku tin regularmente na refineria Isla i ku segun e bòntnan ta pone ku tin hopi chèns riba aksidente. E wèlguistanan, gobièrnu di Kòrsou i e refineria a palabrá ku lo hasi e trabounan pa drecha tur kos rápidamente. Ora e blokeo a start, pueblo a kuminsá kumpra gasolin warda, moda ku ayera no tabatin gasolin na benta mas.

Temblor posterior na Chile
Na Chile tres temblor posterior a kousa pániko. E promé tabatin un forsa di 5.9 riba eskala di Richter, e di dos ku a sigui mésora tabata mas fuerte atrobe ku 6.1. Sobretodo na Concepcion tabatin hopi pániko. E siudat tabata seka di e episentro di e temblor pisá di djasabra pasá. Hopi habitante a hui bai den seru pa miedu di un tsunami, pero segun outoridatnan no tin peliger p'esaki awóraki. Ehérsito di Chile ainda ta buskando sobreviviente. Awo ku nan a logra para e sakeonan di último dianan, militarnan tin nan man liber pa yuda buska e kantidat di hende ku a pèrdè. Te awo ta konta 800 morto.

Ningun desishon den gabinete hulandes pa Joint Strike Fighter
Gabinete demishonario hulandes lo no tuma desishon mas riba kompra di un di dos avion di tèst di tipo Joint Strike Fighter, e asina yama JSF. Segun sekretario di estado Jack de Vries di Defensa ta keda na e gabinete nobo pa proponé e desishon aki na parlamento. Banda di kaida di gabinete e kostonan haltu ta hunga un rol. Den kuminsamentu di siman gobièrnu merikano a anunsiá ku JSF probablemente lo bira mas karu, i ku por kuminsá us'é te na aña 2015, loke ta dos aña mas lat ku a planea.

Detenshon di piloto ku lisensia falsifiká
Na Schiphol a detené un piloto sueko ku añanan largu a bula ku un lisensia di bula falsifiká. Kuerpo polisial nashonal a arestá e hòmber di 41 aña na bordo di un Boeing 737 di e kompania turko Corendon Airlines. E tabata na punto di bula por lo ménos 100 pasahero pa Ankara. Na kuminsamentu di su karera e Sueko tabatin un lisensia, pero esaki a kaduká i no tabata pa avion di pasahero. El a deklará ku e tin 13 aña kaba ta bula ku papel falsu i ku el a hasi por lo ménos 10 mil ora di buelo.

Harpa di plata pa Giovanca
Na Hilversum na e gala di harpa Armin van Buuren, Jaap Buys i Wende Snijders a gana un harpa di oro. Esaki ta un di e premionan di músika mas importante na Hulanda. Un harpa di plata pa talento hóben ku hopi potenshal a bai pa e Hulandes yu di Kòrsou Giovanca Ostiana.

Deporte-Futbòl
E tim di futbòl di Hulanda den un wega amistoso kontra Estados Unidos a gana dos pa un. Den Amsterdam Arena Dirk Kuyt ahink'un pènelti djis promé ku half time. Mas despues Klaas Jan Huntelaar a skor dos pa nada, i djis promé ku final Carlos Bocanegra a drecha kara pa Merka.

Pronóstiko di wer
E dia a kuminsá ku hopi mest, ma despues solo ta bria tur kaminda. Awetardi temperatura lo subi bai te 5 grado. Mayan tin mas nubia i mas lat áwaseru òf sneu.